立即捐款

煙士打淫

麥浚龍的歌,崑南寫散文,黃子華棟篤笑: 情色文化無處不在,最緊要係,佢在你腦海。 網誌

跳軌就起閘門,認真咩

跳軌就起閘門,認真咩
廣告

廣告

粉嶺一星期內兩人跳軌,又有團體爭取增設安全幕門。

但係等等先,佢地點解跳軌?如果話月台太擠擁、佢地被逼落路軌,咁就話要加道閘門啫,但家下係佢地自殺。

23歲仔,大把世界。73歲老婆婆,理應開開心心,享兒孫福。

23歲與73歲,剛好相差50年。我地呢個香港,原來真係咁多人唔開心,你以為年輕氣盛廿歲仔出頭、你以為七旬老婦生活安逸,其實都不然。

遺書都寫好了,仲話要加幕門真係好好笑。與其又用幾十萬,不如花喺社會工作上,多啲關心我地嘅後生仔同老人家,同小朋友同中年。公帑,要用得其所,唔係話拋舊錢出黎就叫做有為。所以有人跳軌自殺起幕門真係無腦,唔通有人跳樓你又喺大廈天台加四幅牆?你圍得佢一時、圍唔得佢一世。

車站,人來人往,你只能望見眼前嗰個人,可能插住耳筒、可能睇緊手機,你望佢衣衫整齊、又著adidas波鞋,以為佢家境應該唔差。怎料,他是特地穿得企理,去走他人生的最後一步。

你覺得「要死死遠啲」、「跳軌自殺正仆街」呢啲說話好惡毒,其實呢班打工仔背後,可能係個好惡頂嘅老闆、而且上有高堂、下有妻兒要養,一個人撐起成頭家,大佬,我真係唔可以無左份工架......一肚火氣、壓力爆煲,又好難怪佢地咁講。

活喺這裡,好像整個城市都病了,抑鬱寡歡。相傳抑鬱病係會傳染,有人跳、就有第二個、第三個......其實唔止跳軌,仲有學童自殺,取消TSA又有咩用?兩歲就扔佢去playgroup,啲女仔喺幼稚園interview個陣記得要合埋腳坐,中、小學操卷文化依然盛行,補習「名師」日日賺大錢、學生趨之若鶩。香港人啊,真係要學下從根源思考個問題。

東鐵綫粉嶺站好邪?上年都有個三十幾歲嘅男人跳軌、終結自己嘅生命。原來佢患癌,已對前境無望。世上沒有邊個地方特別邪,只有特別無為嘅政府。如果佢啲市民都病了,佢仲唔洗啲錢醫治,咁就真係更加無用。

施政報告面世,好多人都問:點解你硬係咁不滿政府?

因為權力喺佢度、我交啲稅喺佢度呀。世界最先進嘅政治體系喺希臘雅典,就係市民走入去議政,一人:一把聲、一票。但隨住人口數量上升,先開始出現代議士,所以立法會議員只係代你講野嘅人。

對政府有要求,係正常不過嘅事。我交稅養住政總班人架,你拎我啲錢去起高鐵、起人工島?我出黎嘈,係我嘅權,係理所當然。而政府聽從民意、積極回應各方,都係責任。

如果林鄭一定要洗啲錢先安樂,我希望係關治情緒病。

願自殺者都安息。

廣告