立即捐款

煙士打淫

麥浚龍的歌,崑南寫散文,黃子華棟篤笑: 情色文化無處不在,最緊要係,佢在你腦海。 網誌

生活

叫雞、食雞的學問

叫雞、食雞的學問
廣告

廣告

昨晚走到大埔街頭,只打算醫肚。經過寶鄉街,有位姐姐仔企喺門口擺街站:好抵玩架,喺樓上咋。我同友人姑且比面呢位「姐姐仔」睇下咩料,但原來係bar黎嘅?!唔得唔得,要食飽先。咁岩見到一樓有間雞煲,抱住美女廚房食左先講嘅心態,入左去萬綠園呢間餐廳。

之唔係呢間野原來好乸把炮,就連《港飲港食》都做過訪問,不過我有啲懷疑係咪轉左手?定我得罪左個大廚?呢間野真係可以打10分比佢,out of 100。

本身都諗住嗌雞煲,不過我月尾(依家算係架喇)糧荒,哀求友人唔好嗌咁盡。最後叫左個$319嘅四人餐(利申我地岩岩好四個人),呢個價錢落樓都咪話唔抵食。

原來呢個價真係收得太低,買到嘅係一啲唔合格嘅服務。例如話叫左碟海南雞,其實好嫩、真係好嫩,但至弊佢有血。有雞毛。大佬咁樣成隻雞擺喺我面前有啲活生生嘅feel,諗到啲血水喺我口腔度蕩漾,我就真係擺唔落口。

你咪話人地做雞煲生意,呢啲碟頭野梗係整得唔靚喇,喂大佬,雞煲入面都係雞,我枱頭個碟又係雞,同樣嘅處理手法點解咁大細超先?做雞煲即係做雞個範喇,連最基本嘅煮熟、無血、無毛嘅要求都搞唔掂,隻雞幾嫩都無用喇。

仲有隻重慶麻辣口水雞,齋淋啲汁落去都算,我都算喇。隻汁完全顛覆左我對「重慶麻辣口水雞」呢七隻字嘅認知。一食落口好似沙爹汁、而且完全唔辣(小弟食開3小辣啲friend),我同三個朋友一致認為呢個汁好難食,仲有條友直頭要左杯水幫隻雞沖身。所以話隻雞幾靚都好,都要有合適嘅配搭,唔係就嘥左佢架喇。

我同朋友都好鍾意叫雞黎食,當然月頭可以約埋一齊去叫啲高檔次嘅雞。啊,世界好似人間天堂、乜煩惱都無曬,好正呀!之但係到左月尾,小弟就身無分文,諗住比幾廿雞叫啲cheap啲嘅過下癮,都唔expect係咁嘅質素架...... 其實海南雞又好、重慶雞又好,最緊要都係正正常常、擺得上枱。我就真係話知你邊度鄉下。

幾時都話,做人最緊要有要求。無錢咪無錢、窮咪窮囉!學星爺話齋,我地雖然窮,但我地唔講大話,亦都唔打交。小弟都要講句:我地雖然窮,但我地唔食有毛嘅雞。有毛嘅都唔食。你諗下個位女士period到,你都唔會想夾硬黎喇?

要讚嘅一定係$319抵到爛,不過小弟就寧願比貴少少、食隻靚啲嘅雞。依家嘅萬綠園,就夠我招呼非洲黎嘅青頭仔、初次見面都會被現場環境整潔企理而打動(無可否認間餐廳門口幾試正),但係對我呢啲經驗老到嘅中年男子而言,真係不了。做人最緊要有要求,其實老闆,真係可以收貴啲、比個好啲嘅服務。畢竟大班兄弟都係求開心,夾份一齊上又點話,至緊要有質素。

小弟喺叫同食雞方面都唔係專家,但有少少底線。第一樣野一定係衛生及安全要做好,唔係嘅話我會好驚架。其次就係服務質素,就算賣相唔靚,所嘢唔睇得都食得,同埋黎得呢啲地方都知:小弟對樣係無乜要求。第三就係價錢,貴同平真係相對,但係相信普羅大眾都會寧願比貴少少、要樣好啲嘅質素。

有啲野真係唔可以「美女廚房食左先講」,唔得架,唔得架。

廣告