不知是否有關係：當我在沒有期望之下跟朋友去看《毒魔》Venom，我只知道他是蜘蛛俠中的大反派，這部應該是講述他的成魔之路。電影開始，發現是強國公司的出品，那時已怕這部應該會有點問題。
結果呢？看了四十五分鐘仍未入正題，為打鬥為特技為飛車而出現的場面，劇情犯駁不合常理，真的越睇越想笑。我又不會指這是一部爛片，但在英雄片系列當中，的確不精彩。最不順氣應該是：片末的彩蛋，第一段是舖下集的，明白；最後那段，喂，玩野呀？有乜關係呀老細。
未寫劇情之前想講一個朋友的影評：女主角的醜樣程度令到毒魔望落唔多恐怖。入場後一邊睇一邊想起呢句，又的確唔明點解Michelle Williams呢套戲會咁醜樣咁囉。
劇情是咁的：男主角Eddie Brock（Tom Hardy）是一名專揭露社會真像的記者，女友Anne（Michelle Williams）好似係律師，幫一個名為生命基金會機構工作，此機構由一名年輕而非常有錢的創業家Carlton成立。電影開首就話有架飛機在馬來西亞發生意外，內裡有部份外星異物不知丟到哪裡，然後當地就有人疑似被異物入侵身體成了魔獸。不過馬來西亞之後發生乜事呢？無講。典解果位被入侵既阿嬋走去搭飛機，然後再上左個小妹妹身呢？又無講。
好喇，Eddie 因為偷睇Anne 電郵去報導導致自己無左份工連條女都無埋，無所事事生活非常唔掂既佢，有一日收到生命基金會有位博士聯絡，指主席一直在進行非常不人道的研究，找來露宿者簽了不明所以的同意書，拿去與異物結合作測試。Eddie後來真係潛入該大樓調查。
好喇，呢位博士唔知典解咁叻唔驚俾人查到，用自己電話同Eddie一直聯絡，偷運佢入去過程異常順利（即係保安唔多嚴啦）。更神奇係，Eddie竟然見到佢有位露宿者朋友被囚，話咁易就打爛玻璃救到人，嘩，會唔會兒戲左少少？
跟住當然係Eddie 被異物入侵成魔，初期唔知乜事咁啦。Carlton 知道有人同異物咁夾好想捉佢番黎，好喇，任由你幾大勢力都好，果段將成個三藩市反轉既飛車追逐戲真係搵戲黎做兼不可能又唔係特別緊張（最慘仲要有類似「嘩，架車飛起，落慢鏡先」既安排）。
查實Venom 係呢套戲性格都非常咁可愛：原本好想做低地球人，就因為遇到Eddie愛上地球唔想佢個星球既同類黎將地球毀滅，哈，因乜原因呢？唔知。另外，當然不得不提，阿醫生男友帶佢番去醫咁勇敢呢件事啦！Venom 變番一PAT野以為佢走去邊，哦！竟然上隻狗身！更勁到可以上完隻狗身再自由意志地同Anne 合作上Anne 身去救Eddie，果段我真係，唔知講乜好。
仲有，果位年輕有為既Carlton 好多野都幾夾硬黎：夾硬要人體實驗，夾硬要箭升空，呢段戲從最開頭佢希望搵異物人類共存到後來已經亂晒，嗯，可能佢俾異物附身所以亂左咁啦。
最後高潮結局呢就估到晒既，打鬥呢都係一貫快快快連眼球都跟唔切果種啦，然後就，咁囉，無事，Eddie 同Venom共存，咁先有戲做嘛，然後第一粒彩蛋話你知，係呀，一定有第二集。
不過有冇人解到我知，第二粒彩蛋，等到尾先整段卡通片，想點，你有冇想講粗口呢？