立即捐款

Momay

我係熱愛足球嘅油漆佬。 網誌

體育

香港隊想大炒蒙古?問過呢位蒙古高佬先啦!

香港隊想大炒蒙古?問過呢位蒙古高佬先啦!
廣告

廣告

球迷問,蒙古有咩好波嘅球員值得留意?好唔好波就唔敢肯定,但佢哋嘅隊長Bayasgalangiin Garidmagnai值得球迷認識吓,因為喺第一屆東亞盃外圍賽佢已經有踢,畀香港大炒嗰場佢係正選球員,當年佢係隊中嘅小朋友,雖然擁有192cm嘅高度,但可能經驗不足,技術非常幼嫩,但如今已經變成蒙古足球殿堂級人物,成為蒙古國家隊內精神之柱,佢係唯一經歷蒙古由亞洲大魚腩開始進步到今日作客馬來西亞可以唔駛輸嘅球員。

Bayasgalangiin Garidmagnai幾乎每屆東亞盃都會見人,起初佢係踢防守中場,2007年嗰屆佢喺對關島嘅比賽射入咗一球世界波,亦係佢國際賽嘅第一球,後來都有跟隨蒙古征戰各種比賽,亦喺效力蒙古半職業球會Erchim FC時幫手踢過主席盃,後來改踢中堅,今年係蒙古國家隊嘅必然正選,有時會樣出隊長臂章,但佢嘅存在對其他後輩球員嚟講係種寄托,蒙古隊能夠殺入第二圈,佢喺後場奮力防守都係一個關鍵。

而佢同絕大部分蒙古足球員一樣都唔係全職業足球員,佢嘅正職係教小朋友踢波幫手訓練青少年,不過根據我阿媽嗰朋友嗰細妹條仔嗰同事嘅姨媽嗰姑姐嗰囡嘅老公養嗰隻狗嘅情婦嗰主人都可以修改嘅維基百科Bayasgalangiin Garidmagnai條目指出,佢曾經出國效力伊拉克球會Erbil SC,而俄文維基更指佢喺2011年受到中國嘅大連實德賞識仲簽埋約成為蒙古足球史上第一位外流球員,只不過大連將佢借返去蒙古嘅Erchim FC,但如果有一個蒙古球員畀中國球會簽咗,點解會揾唔到任何來源?出名多假料嘅新浪都冇相關新聞,甚至上百度揾埋自稱前實德死忠,都唔知有嗰蒙古球員踢過大連,而外流伊拉克都係連半點來源證據都冇,最後我揾埋佢嗰社交賬戶,如果係有外流過應該會有相睇吓,但最多都係見佢喺恆大㗎巴士前面影吓相,仲要係帶小朋友去廣州交流時留影,所以我都唔使咁唐突問佢,肯定維基上嘅資料外流一欄係假,而有啲球員資料網,連佢效力過邊間蒙古球會都可以錯。

但無論如何,佢都係蒙古後防最重要嘅球員之一,後日香港隊一定要盡量喺蒙古身上取得入球,如果繼續踢正選我諗大家會有好多機會見到佢,2003年香港以10比0大炒蒙古,身為防中嘅佢連波都控唔掂,慌失失嘅表現成為賽後其中一個笑炳,如今已經成為蒙古國家隊大師兄,改踢中堅,唔知頂唔頂到香港隊嘅強攻呢?

廣告