上個禮拜各大傳媒陸續報導「屯馬綫」有機會分段通車嘅消息，亦有曾任九鐵主席嘅田北辰話沙中線九龍段下年「點都要開」，同時要求開到落何文田站。因乜解究馬鐵出九龍「2019一定要得」？開落鑽石山、啟德同何文田，當中有咩考慮？田二少所提倡嘅方案係咪全盤皆可行？
2019，點解「一定要得」？
若干大型資產更換工程，正正就係等「屯馬綫」通車後先可以做到。屯馬綫一日未開，後面排緊隊嘅工程一樣都做唔到。2019年紅磡站擴建月台未能啟用，呢點相信係毫無懸念。屯馬綫成唔到形，起碼都搵馬鞍山綫南延「袋住先」：啟用大圍至鑽石山呢個「關鍵路段」。後面排緊隊嘅工程有咩？
（1）東鐵換訊號系統、換新車、裝閘門
如果按照鐵路公司原來計劃，東鐵響此時此刻理應提升訊號系統同更換列車，9卡同12卡列車同時運行。但近年嚟大眾關心鐵路系統「滿載」情況，鐵路公司約於一年前於提交立法會文件交代，指等待屯馬綫通車、成功分流部分東鐵乘客後先開展「減卡計劃」。
東鐵中期翻新列車年事已高，南韓製新車又只係裝咗新訊號系統。一日未「正式啟用」新訊號系統，舊車繼續捱，新車只能曬太陽，東鐵滿載情況難以出現轉機。新車舊車門位唔同，未換晒新車、淘汰舊車，月台閘門又裝唔到。屯馬綫通一段，總好過咩都通唔到。
（2）日製列車尚待改裝，工期延長成本增加
至於另一條「和味」數就係將現時行走東鐵嘅日本製列車（千九），跟悉數運至八鄉車廠等候改編嘅馬鐵四卡列車，進行改裝及重編。現時仍有5列12卡千九列車行走東鐵，東鐵一日未正式「減卡」，呢5列車一日都走唔到去做改編。
呢5列東鐵12卡車，連同部份曾經行走馬鐵嘅4卡列車車廂，將會重組為10列8卡列車行走屯馬綫。減去呢10列8卡車，屯馬綫全線通車之時將配備55列8卡列車。55抽列車仍足以維持現有服務水平，即早上繁忙時間班次為3分鐘/每小時20班次。
雖則屯馬綫通車之時，未需要用到盡65列列車。然而當工期延長，廠商仍要預留足夠人力物力去完成剩低嘅工序，成本增加自然導致延誤及超支。鐵路公司一來唔想再增加成本，二來要廠商無了期咁等都唔係辦法，自然需要考慮折衷方案，包括係近日流傳嘅分段通車計劃。
（3）大圍-九龍塘樽頸位幾嚴峻，一個「山竹」、一次「四綫故障」睇清睇楚
現時要使用鐵路，由新界東出九龍就只有東鐵畢架山隧道呢條路。大圍至九龍塘段一直都係東鐵嘅樽頸位，平日繁忙時間兩條轉線通道都已經迫滿人，沿路有職員維持秩序。遇上嚴重延誤，唔理係颱風過後所致，定係市區綫訊號系統攬炒引起，新聞報道見到嘅大圍站同九龍塘站都有一個共通點：「人，全部都係人」。
馬鞍山綫出到九龍，哪怕只係去到鑽石山，都可以畀前往九龍東甚至港島東嘅乘客，多一個乘車路線選擇。假如咁不幸東鐵因為事故而出現延誤甚至需要暫時停駛，新界東乘客仍然可以經馬鐵獅子山隧道段去到九龍。
鑽石山、啟德定何文田？要考慮軌道配置同車務運作
新聞報道入面曾經咁講：「鑽石山站和啟德站之間設有換線軌道…何文田站與紅磡站亦有換線軌道，但或因太接近紅磡站而無法換線，故（田北辰）建議明年可在鑽石山站至何文田站走單軌雙線，班次將減少一半，但認為「技術上絕對可行」。」（見明報11月9日報道）到底技術上係咪可行，首先就要知道「換線軌道」位置響邊度。
參考友台 MTRiders 所製作嘅軌道配置圖，可見鑽石山及啟德之間，以及何文田及紅磡之間設有渡線（即所謂「換線軌道」）。然而睇埋渡線實際所在位置，渡線係非常接近啟德站。換句話馬鐵南下至九龍嘅列車，起碼要去到啟德站先可以更換行車方向。（參考相關環評示意圖）
渡線位於啟德站往鑽石山站旁
何文田與紅磡之間嘅渡線，則較為接近紅磡站。而由前紅磡貨場改建嘅屯馬綫列車停放處，其列車主要進出口接近尖東站。連接何文田站及紅磡列車停放處嘅軌道，乃屬列車停放處之「緊急軌道」（Emergency Launching Track），設計上無計劃恆常使用呢條路軌來往停放處來往列車停放處及何文田站。（參考相關環評示意圖）經列車停放處調頭理論上可行，但緊急軌道嘅速度限制將增加列車調頭所需時間，繼而影響班次。
何文田站往紅磡站入站前設有列車停放處的緊急軌道
假如分段通車嘅傳聞屬實，淨係考慮鑽石山同啟德，最大考慮係啟德有無足夠時間做調頭。若要減省落啟德調頭嘅不穩定因素，選擇鑽石山清客能夠提高安全系數。但既然落到啟德，點解唔索性開埋啟德站？
再考慮埋通到何文田，基於現時路軌配置上嘅情況，若所有由烏溪沙開出嘅班次皆落到何文田，難以維持現時馬鐵早上繁忙時間約三分鐘一班嘅班次。聞說過其中一個講法，就係假若決定開到何文田的話，部份班次仍會於大圍調頭。至於另一個要開晒九龍城段所有車站嘅辦法，就係何文田至啟德（而非田議員提嘅鑽石山）以單線雙向形式行走。但呢種「拉風箱」運作模式，只係得一列列車行走何文田至啟德區間，班次稀疏、乘客亦需特別留意列車行駛方向。乘客又會唔會接受呢種運作模式？適應能力如何？呢點尚待居民之間認真討論先知。
如果鐵路公司決定分段通車至鑽石山或啟德，有人建議開辦與新鐵路平行嘅巴士路線行走九龍城區作替代。不過，九龍城區已有來往馬鞍山、沙田、鑽石山以及尖沙咀。與其建議鐵路公司開一條「平行巴士路線」補償/爭生意，不如跟現有嘅巴士路線提供轉乘優惠（如來往鑽石山站及九龍站，經太子道東、馬頭圍道之11號線），更為實際。
除紅磡站相關工程外，其餘屯馬綫嘅工程已進入尾聲。鐵路公司工程部門將陸續移交車站及路軌至車務部門，距離新路線、新車站開幕又邁進一步。只不過，幾時先可以行到呢個工程嘅最後一步：全線安全通車？At this moment, no one knows.