假假地自己都算半個文化人（即係有一半冇文化）， 唔出聲驚人會話我啞！
今日睇蘋果，見到尊子終於同我搵番個親生仔：you know what 你懂的。
我哋同689一樣，全家從來唔改英文名， 淨係叫 you know mum ，you know what， 唔會叫 Richard Lee…… 除非李嘉誠肯做我老豆。
由馬會出錢活化嘅中區警署，變身成為香港藝術文化新地標「 大館 」， 聽講目的係推廣香港同國際間嘅文化藝術交流，馬會負責管理同埋聘請叻人。
202X年……《全港學界文藝創作比賽》
陳小明同學，以「美人遲暮」為題參加比賽， 畀大館DQ咗。
原因係「美人遲暮」呢四個字，出自屈原嘅《離騷》，屈原擺到明唔妥皇帝，用呢四個字做題目等於政治宣傳。至於冠軍作品，屬於李向陽同學嘅《疑是民間疾苦聲 一枝一葉總關情》，由於習主席曾經用鄭板橋呢幾句作為談話內容，連央視都開一個特備節目詳細解構，證明李向陽同學 係一個愛黨愛國愛主席的嘅好學生，得獎實至名歸！
有啲讀者可能以為以上劇情誇張搞笑，其實，今時今日全中國所有大學，想入讀都必須做呢個愛黨愛主席嘅「交心」指定動作，一啲都冇誇張。
有啲讀者唔明，點解我一方面諷刺非建制派向特區政府抗議馬凱事件係除褲放屁徒勞無功，另一方面自己又批評大館拒絕馬建事件，係唔係精神分裂？
其實我精神健全嘅程度，仲高過 ifc加埋icc。
仲以為特區政府真係擁有高度自治權力嘅傻佬傻婆，先至會向特區政府抗議。
但係馬會唔同，佢係全香港唯一唔使靠大陸市場都搵大錢嘅機構，可見嘅將來，我都睇唔到大灣區有機會設立場外投注站， 我亦都睇唔到馬會短期內可以喺大陸開設可接受投注嘅馬場。
所以，馬會如果唔認同佢自己夥記簡寧天（Colnin）嘅做法，完全可以炒佢魷魚，上一任總裁顏士同（Upston）都係馬會唔續約，舊年走咗先至請簡寧天接任。
當然，如果大陸施壓令到馬會係香港無法生存，等於正式宣佈一國兩制死亡，幫香港拔喉（而家只係彌留狀態），咁香港七百萬人就可以安心上路。
最後我再問一句馬會，你哋係唔係認同自我審查？
如果你哋兩星期內唔炒簡寧天魷魚，我決定以後都唔再幫襯馬會！