近日佔中案開審令人回到雨傘氛圍，我想記錄感受好大嘅今晚。
.
早一晚，Facebook「當年今日」回顧三年前學生C君家長喺C君去外國讀書前同我講嘅一席話。當晚：
.
// 佢阿媽叫佢拎一份禮物俾我。
一打開，嘩......
「阿媽話係佢手造架。」
點解佢阿媽會送俾我架？
.
撥一通電話，「你好呀C君媽咪，收到你份禮物喇，多謝哂呀......(下刪打招呼問候下)點解你會送呢份俾我嘅？」
.
.
「呢份嘢係我同我d朋友自己造，我地想話俾所有人知，我哋係冇忘記過雨傘運動！我特別想送俾你，你比我地更前線。社工呢份工好有意義，改變下一代，改變未來社會，我好想鼓勵你哋，隻戒指就送俾你太太！」
.
眼睛即刻濕潤呀！//
.
--------------------------------------------
.
.
今晚，C君回港約我同組員們食飯吹水。
呢個係2007年開始嘅小組，至今11年，小學生C君由我腰間咁高發展成為196cm高嘅巨人。
.
.
踏入以前日食夜食嘅上海舖，老細同我講話：「嘩，你哋終於又再一班人嚟！」
由侍應轉戰大廚嘅姨姨走出嚟同我握手話：「嘩！好耐冇見你呀！」
曾經深耕過嘅馬鞍山，我除咗留低好多腳毛，仲留低好多口水。
.
老細仲認得C君，記得佢一定係食蝦仁炒蛋，飲朱古力珍珠。學生幫我叫麻辣豆腐，蜂蜜綠茶，我又幫佢哋叫水蜜桃紅茶，佢又幫佢叫佢嘅all time favourite糖醋排骨、麻辣雞丁。邊個要酸辣湯，邊個要豆腐湯，真係真正嘅心知肚明。呢件事係好浪漫，比落屋企附近小店侍應認得你再幫你叫「例牌」更浪漫。
.
.
由個人講到學校講到讀書講到工作講到社會，由香港講到台灣講到澳洲講到世界，由主流社會講到一堆中台日韓次文化，次次我都喺佢哋身上學識好多嘢。
.
轉場再傾，大家上咗C君屋企。C君媽媽擺咗聖誕樹，叫我一定要睇。唔睇由自可，一睇眼濕濕。上面每個掛飾都寫住「我要真普選」。
.
「我仲堅持緊。」腦海中浮現當年C君媽媽手造俾我嘅兩粒黃絲帶扣針、手造俾我太太嘅黃絲帶戒指，鼓勵我哋要做個好社工，做好社會上嘅公民教育同青年工作，喺扭曲嘅教育制度下，社工好緊要乜乜乜。回過神來，參觀C君房間，媽媽叫C君要睇八九民運，睇雨傘書藉，睇魯遜...我覺得，有一個咁嘅家長，先係好緊要同令人驕傲。
.
.
然後越嚟越夜，但不斷有人加入聚會。屋企食完飯嘅嚟，開完莊會嘅嚟，收工嘅又嚟。大家一路打機一路同唔同人傾計，又回顧大家N年前黑暗中一路打機一路傾計。當年嘅PS2已經進化至PS4，Wii變咗Switch。大家變咗好多但有啲嘢又冇變，有經歷嘅長期小組總會俾我呢個感覺。
.
當年我哋為小組設定嘅組員學習階段有三：
1.任何東西都可以成為遊戲
2.任何遊戲都有意義
3.任何事情都有意義
.
.
或者階段三，喺十幾年後終於達成。
.
.
呢班人好鍾意玩一隻PS4叫《地球防衛軍》嘅遊戲。學生介紹遊戲：「面對怪物或者外星人襲擊，我哋唔係咩超人，咩英雄，咩機械人，我哋只係負責擊退外星人嘅一個士兵仔，一個嘍囉。」
「吓？咁玩到幾時完呀？」
「你同個團隊打哂啲怪物就完，或者等劇情發展，就會知幾時完，Keep住打，唔好死就ok。」
.
我覺得呢個遊戲真係佢哋嘅真實寫照。