點解 #火車未到站 ？因為高速鐵路香港段通車後，少咗人由中國搭「火車」嚟香港
高速鐵路香港段通車已兩個月，政府向立法會鐵路事宜小組委員會提交文件，交代廣深港高速鐵路香港段嘅營運事宜。截至11月29日，高鐵香港段總乘客量為3402013人次，日均人次為50030。香港居民佔高鐵乘客人次比例，離港及抵港分別為32%及28%。
如果期望高鐵通車能夠對由中國各地經「火車軌」落香港嘅乘客作分流，效果似乎麻麻地。高鐵通車後，經羅湖或落馬洲搭「火車」嘅日均客量為313000人次，只係比去年同期微跌1%；至於搭「城際直通車」嘅日均客量則為7000人次，比舊年同期少28%。
直通車可謂係讓東鐵班次出現變數嘅其中一個原因，多咗人搭高鐵、少咗人搭直通車，係咪可以讓下年將會陸續更換列車及訊號系統嘅東鐵有更大加班空間？文件提到：「政府會密切留意城際直通車的乘客量， 將來考慮是否需要調整城際直通車的服務。」即係點？短期內一切照舊。
至於高鐵現時日均客量未係政府於2018年8月公佈嘅預期數字8萬人次，係咪就代表高鐵項目大白象？政府話：「我們相信待更多乘客體驗到高鐵所提供的便捷服務後，乘客量會繼續穩步增長。」至於你信唔信，「我反正信了」。