立即捐款

體育

加利韋特走人,然後呢?

加利韋特走人,然後呢?
廣告

廣告

短短三個月,白咖喱為港隊留低啲咩,港隊嘅前途又如何?

簡單咁講下加利韋特離隊同港隊嘅帥位。

個人覺得由加利韋特上任開始嘅選帥風波,對於佢僅僅執教三個月就辭任唔會毫無關係。如果佢嘅離隊,純粹係因為足總董事嘅「爆料」,同埋傳媒喺呢場風波中施予嘅壓力的話,對於港隊而言絕對係損失。

雖然執教短短三個月,但係論成績,加利韋特絕對有交待。帶著並非最強陣容嘅港隊出戰東亞足球錦標賽外圍賽,仍然取得兩勝一和,繼2009年後再度晉身決賽周。上任短期內就追平金判坤嘅最佳戰績,確實係三個月任期內嘅一大成就。

人腳上,加利韋特基本上只有兩次友誼賽嘅選兵機會(東亞盃外圍賽初選名單喺對泰國前已經遞交),不過亦為港隊帶嚟冇咁常見嘅面孔:除咗今年入籍嘅中村佑人同基奧雲尼之外,部分較年輕嘅本地球員亦獲得上陣機會:中堅嘅梁諾恆、右閘嘅曾錦濤,與及摩力克時代曾披起港隊戰衣嘅李嘉耀,都喺加利韋特領軍下,取得上陣機會。

至於亞運表現出色嘅鍾偉強,更加成為加利韋特喺東亞盃外圍賽嘅奇兵。除了對戰中華台北時奠定勝局,其活力和突破能力,都屬近年港隊本地球員少有嘅元素。(冇計,前線嘅本土球員選擇唔多)對於需要換血嘅港隊而言,鍾偉強嘅崛起對前線提供咗一個新選擇,可謂加利韋特執教港隊少有嘅遺產之一。

另一項加利韋特為港隊可能留下嘅遺產,就係海外球員嘅搜索。據加利韋特以往嘅訪問,足總喺佢任內主動聯絡部分合資格代表香港嘅海外球員。如果確實有海外球員可以代表香港,並且願意接受徵召,呢個絕對係加利韋特對港隊嘅貢獻。

喺加利韋特離隊之後,足總如無意外會開始全球招聘嘅程序。但係以上次招聘嘅經驗,經民政事務局通過撥款再開始招聘,應該都需要大半年嘅時間。新教練要趕及2019年底嘅東亞盃決賽周應該不成問題;但係尚未公布賽程嘅2022年世界盃亞洲區外圍賽,按上屆賽事嘅推算,可能喺2019年中就會開始。屆時新教練能否趕及執教,絕對係未知之數。

如果招聘新教練嘅程序,係未能趕及喺世界盃外圍賽前完成的話,內部提拔署理教練領軍亦係足總應該考慮嘅方案。自2016年,足總聘請過兩位菁英發展教練,分別係現年57歲,曾經執教橫濱FC嘅日本教練足達勇輔,與及24歲已經考獲歐洲足協Pro License,曾擔任皇家馬德里球探嘅32歲西班牙教練卡路士安頓。短期內由其中一位教練暫代港隊帥位,絕非不可考慮嘅選擇;一旦領軍成績好,或者為港隊帶嚟需要嘅元素的話,足總亦可以選擇長期合作。

無論如何,加利韋特嘅離去,標誌著港隊看似有曙光嘅未來,又再變得撲索迷離。前路如何,還望足總能夠汲取過去幾個月嘅教訓,好好規劃將來。

原文刊在作者 Medium
作者 Facebook Page

廣告