立即捐款

Momay

我係熱愛足球嘅油漆佬。 網誌

媒體

31台有6400人睇,係咪計多咗啲?

31台有6400人睇,係咪計多咗啲?
廣告

廣告

雖然我成日睇港台31,但我都覺得佢哋收視「冇點」得6,400人睇係好正常,甚至懷疑有冇6400人咁多,不過唔係港台31冇嘢好睇,呢個台大把好嘢睇,好似晚9半播緊(之前播過)呢個外購節目叫《型男旅遊》,由 Simon Reeve主持,呢個唔係一般介紹飲食玩樂嘅節目,每次 Simon Reeve 去一個國家都會探索佢嘅風土人物同宗教政治問題,好似今集上半部講聖地牙哥朝聖之路,下半部講宗教對羅馬發展影響,佢以一個無神論者角度探索件事,最後發現好多朝聖嘅人唔止為咗宗教而展開旅程,甚至只擋一個健身挑戰,不過大家都離不開一個目標,而 Simon Reeve 曾經覺得呢個世紀嘅人可以開始唔需要宗教,但佢去到羅馬已經改晒觀,仲有宗教令部分羅馬酒店生意極旺,好多嘢已經唔同哂。

而早排有兩個系列我覺得非常好睇,第一個係 Simon Reeve 去克里米亞睇吓畀俄國吞噬後係咩世界,然後就入西伯利亞睇城市發展,最後去遠東探索圖瓦文化同埋伐木猖狂嘅原因。第二個係緬甸系列,首先了解緬甸極端佛教徒對羅興亞嘅指控係咩,然後深入難民營探訪羅興亞人生活,仲揾到幾個因為想向緬甸政府報復而加入IS嘅羅興亞人,雖然節目得一粒鐘,但睇完已經明白何解昂山唔多敢掂呢單嘢。

我冇喺黃金時間睇大台同明珠啲嘢太耐,記得十年前明珠8半起都有呢啲探險式資訊外購節目,一樣高質素,家陣喺港台只不過延遲少少播,但呢個時間會坐喺電視前嘅觀眾你估大多數睇咩?我相信喺呢個時間睇電視嘅觀眾都習慣睇電視劇集多,況且仲有J2腥民台明珠財經兩個Viu一個奇妙揀,仲有幾多人揀喺呢個時間坐定定睇緬甸啲和尚點解咁憎羅興亞?

所以6,400定6,800,其實唔算少,喺港台31編排特別嘅情況下。

雖然好多人都係上網睇港台嘅節目或劇集,港台並非WFC,但有啲外購節目因為版權冇得重温,當然可以用其他途徑揾嚟睇。

廣告