今日同車迷朋友吹開水，傾開法比加斯轉會摩納哥。佢突然問我：「其實你仲憎唔憎佢當年離開阿仙奴？」，我好淡然回應佢一句：「已經過咗去。」
老實講，作為阿迷，當年真係接受唔到法比加斯兩次打擊。
第一次打擊係法比加斯貼錢出走，重投曾經放棄自己嘅巴塞隆拿；
第二次打擊係法比加斯喺巴塞唔掂嘅時候，選擇轉投阿仙奴死敵車路士；
當然你可能會反駁，當初阿仙奴無成績又冇錢，根本留唔住當紅球星；亦可以反駁法比加斯當年重返英超首選係阿仙奴而非車路士。但作為阿迷，見到法比由貼錢出走再主動投懷送抱，嗰刻你唔會感恩：「你終於返來囉」，而係會好嬲咁同佢講：「你當依度係咩啊，唔掂就返嚟啊？」
係，就算曾經深愛著法比加斯，但始終掩蓋唔到佢出走嘅悲痛，可以話係因愛成恨。不過其實都過咗咁多年，要嬲嘅乜都嬲完。
我唔知咁樣算唔算釋懷，但我諗其實係我已經放低咗法比加斯，佢已經係一個唔需要再諗起、亦唔需要再有任何感情嘅人，無論佢去邊都已經唔會再有感覺，即使佢淚別史丹福橋球迷，對我嚟講已經唔係咩一回事，既無愛亦無恨，就同陌路人。（當然可能有啲人仲係好憎佢。）
人與人之間嘅關係最陌生嘅情況，並唔係你從來唔認識佢，而係對方由最親蜜嘅人喺最後變成路過都唔會打招呼嘅陌路人...
雖然係咁，但見到佢離開車路士，心入面都會有種歲月不撓人嘅感慨。我唔係好知應該用一種咩感受去看待呢次轉會，唯有平淡大方地祝福佢，下一站幸福。
頭盔位：此觀點僅代表我自己，不代表全體阿仙奴球迷
題為編輯所擬