立即捐款
ads

政經

馬迷比朱凱迪可信?

馬迷比朱凱迪可信?
廣告

廣告

香港可以荒謬到咁嘅田地,我真係笑到喊唔出聲。

政制及內地事務局局長聶德權解釋國歌法:「如果馬迷專注刨馬經,冇留意奏國歌不屬違法。」

哈哈……哈哈哈……哈……一個七百萬人嘅社會,其中某個市民是否「真誠」、是否「專注」、是否「嚴肅」……… 呢啲咁虛無嘅個人意志孰真孰假,竟然全部要由一啲九品芝麻官作出決定!

好耐之前我已經寫過我對國歌嘅態度,奏國歌嘅時候我會起立,正如端午節我會食粽,應節嘅嘢,大家開開心心何必爭拗。

但係你夾硬要立一條法例,端午節唔食粽等於侮辱屈原要拉去坐監,我梗係唔服氣。

當然,為咗唔使坐監,我一樣會跟大隊好嚴肅咁起立好似董伯伯咁口噏噏(口中念念有詞……DLLM屈原……DLLM屈原……), 你吹咩?

聶德權局長,我想請問,星期六賽馬日,金紫荊廣場同埋沙田馬場同時奏起國歌,兩個地方都有老馬迷耷低頭專注刨緊馬經,法官應該點判?
係唔係再次由人大釋法,除咗馬場,全香港所有地方唔可以刨馬經?

認真,如果有任何一個建制派議員夠膽去黃大仙發毒誓,for example : 「 本人周浩鼎,真心誠意見向大仙發誓,自己內心深處真心尊敬國旗國歌,如有半句虛言,絕子絕孫!」

有一個肯去黃大仙,我李懂媽立刻捐三千蚊畀公益金,兩個就捐6000,如此類推…… 上限五萬蚊。

#以後大家出街記緊要袋住本馬經

廣告