流感高峰期，公立醫院迫爆，前線醫護做到死。醫管局高層的回應，便是搵明星拍片，為醫護打打氣。
事實證明，醫管局高層病入膏肓，是香港醫療系統最大的問題。明星拍片打氣，高層諗住可以帶嚟咩效果？前線醫護睇完就提起精神頂硬上？
似乎惟一既效果，就係醫護人員會感覺被羞辱。高層你覺得我地係馬騮？睇下馬騮戲就會開心？
上星期先發起集會既香港護士協會，佢地係講緊乜？高層只要去睇下佢地個 facebook 就會知。人地提出四個範疇，包括「維持合理人手」、「改善行政管理」、「加強臨床督導」同「更新病房設施」合共25項要求。拍片打氣就當係回應咗人手不足、待遇欠佳、過多行政文書工作同設施陳舊既問題！？
好喇，當你醫管局高層唔識上網，但議員直接俾你既信呢？立法會醫學界議員陳沛然俾咗封信高層，直接講咗五項建議，包括在流感高峰期減少非急症病人入院、減少總部高層開會及提升薪酬。陳沛然醫生亦指出，二十年間醫管局病床數目減少了逾千張，但期間香港人口增加11%，即73萬人。另一方面，醫生人數卻由三千多人增至六千人，但時間都花在開會，明顯是資源錯配。
好喇，醫管局高層可以話，資源調撥由政府主導，佢地都無計，OK。但唔止陳沛然醫生，唔少醫護人員都已經將矛頭直指高層，認為行政文書開會工作太多，而總部架構亦愈來愈大，人手上升比例遠超前線。
來源：物理治療起動
前線已經直接你醫管局高層同總部既痴線行為，點解仲要拍片挑釁佢地？「杏林覺醒」既小編就話「小編好想問，條打氣片用咗幾多錢拍？不如將啲錢買返啲新嘅醫療儀器、氣墊床、床單同被啦⋯⋯小編個病房連心臟監察儀（Cardiac Monitor）都唔夠呀陰公⋯⋯」
惟今之計，係撤回六條打氣影片，高層鄭重向前線醫護人員致歉。
星期六，就全體高層再次去「不在沉默中谷爆」公共醫生申訴大會上，向公眾及前線醫護人員鞠躬道歉，坐定定係度俾人話三個鐘。
待醫護人員消消氣，好過搵明星拍片。
「不在沉默中谷爆」公共醫生申訴大會
主辦機構：香港公共醫療醫生協會、前線醫生聯盟、陳沛然立法會議員辦事處
日期：二零一九年一月二十六日（星期六）
時間：下午二時至五時
地點：伊利沙伯醫院 M 座地下演講廳
嘉賓：食物及衞生局局長陳肇始教授、醫管局總裁梁柏賢醫生