公營醫院服務爆煲政府就興搵藝人出黎打氣，學人賴土地不嬲唔夠同人手不嬲不足，你睇下依家政府喺新界北土地規劃攪緊乜，就知道話佢涼薄偽善係冇講錯架。
根據上年公佈既新界北初步規劃研究報告，呢個佔地成5,000公頃既邊境地區，未來重要講到明話要大力發展俾高齡陸客做「醫療旅遊」（Medical tourism for aging PRC population），同時有估算未來香港醫療服務既就業增長，係會由2012年約79,000職位激增多13萬3千個位出黎，增幅成1.8倍好有可能就係考慮左攪呢啲「醫療旅遊」既估計。
我想好粗略咁講：條數肯定嚴重低估，如果你要將香港未來新市鎮既定位，係去服務未來全國13億人中產以上既高端銀髮市場，你要填多幾個東大嶼人工島，請多100萬個本地醫生護士都唔夠啦。
重有，我地拎成千億公帑出黎俾你收地規劃，啲私樓起到去打鼓嶺落馬洲又攪埋一站式中港醫療旅遊，你估最後規劃出黎究竟又係俾邊個？
其實香港人有咩得罪左特區政府，將未來本地醫療資源拎去賣俾高端陸客消費，依家連自己排急症閒閒地都等8粒鐘，做啲小手術有啲小市民逼左去左平啲既深圳，又口口聲聲話人力資源培養唔夠，咁你重好意思規劃啲地分哂啲醫療人才出黎服務陸客? 你當香港既普通市民全部都係死架，俾唔起錢就你死你事？
造地唔係俾你用，冇錢當你低端人口，如果你重係覺得咁樣既土地規劃係冇問題，呢個未來你係值得擁有。