華航機師罷工逼使管理層談判有關「疲勞航班」同台灣本土機師職訓等同航空安全關係密切嘅議題之外，工會要求今次談判協議當中有關機師權益嘅項目，只可以由會員專享。嗱﹗嗱﹗嗱﹗有啲人又想起鋼喇﹗
「點解唔加入工會，就無得享有這些福利呀？」（高音八度）
「你哋係唔係工會霸權呀？」（手指指）
查實有實力嘅工會，自然爭取到咁嘅條款，咁嘅制度唔係霸權乜乜乜，反而係更加可以鞏固工會爭取嘅成果，保障所有員工。試諗下，如果部分員工唔參加工會，只係一心諗工會幫佢哋爭取，咁既然唔參加罷工，都可以得到罷工爭取到嘅成果，對於罷工嘅會員又公平咩？老闆就更加可以用唔同嘅手段分化員工，從而唔同工會談判。
喺台灣，禁搭便車條款本身都有法律依據（你睇人哋幾完善﹗﹗﹗），按其《團體協約法》（即集體談判法），訂明協議內容如無「正當理由」，僱主唔應該將協議內容適用於非工會會員嘅員工。當然，呢個應該只涉及權益項目，職訓、改善疲勞班表等議題，仍然應該係員工整體適用。
世上無免費午餐，自己嘅權益要自己去爭取。「會員專享」嘅條款，喺外國好多工會嚟講，已經係慣例。香港嘅工會權利仍然不成熟，仲需要我們一步步去努力。