政府有地唔用，花成一年半搞場土地大龍鳳，真正目的終於揭曉。發展局長黃偉綸今日出來回應土供組最終報告，花極大篇幅將未來土地供應策略定調為「建立土地儲備」，仲講明即使出現經濟變動同物業價格波動，都要將「持續增加土地供應」嘅方針貫徹始終，真係緊跟黨中央，發展就是硬道理！
關鍵字：「基建主導」、「創造容量」
面對公眾質疑「明日大嶼」假大空，1,700公頃人工島遠超本港市民居住需求、又要花成萬億填海兼起幾條跨海鐵路公路接駁，黃偉綸今日就將哩種發展模式正名為「基建主導」、「創造容量」，明言「即使某些基建設施項目從經濟角度未能達至最佳效益」，都要盡早發展，咁先可以「預留空間以應付無法預計的情況和把握突如其來的機遇」，究竟係咩「機遇」咁突如其來，莫非係蘇州過後無艇搭嘅大灣區？仲話要「善用資本、科技及創新意念來克服土地限制」，可能大灣區嘅創科產業包括念力填海啦！
「願景帶動」土地估算 （又名：有咁大作咁大）
自土地大辯論諮詢文件公開以來，政府提出嘅1,200公頃土地短缺已經被我們拆解出當中如何錯漏百出、涉嫌高估需求造大盤數，合理化「明日大嶼」填海計劃。政府本來話2018年底會由規劃署更新土地需求估算，但到而家影都無。喺今日嘅政府回應土供組文件卻可以見到最新指示：「規劃署應獲賦權作更進取的土地需求預測，在更新土地供求情況的推算時納入土地儲備的概念」，而政府內部統籌規劃及土地供應事宜嘅土地供應督導委員會，更加要「以願景帶動和具前膽性的方法重新評估本港在房屋、經濟、社區和康樂方面的土地需求」，即係以後連造盤數都唔需要喇，只要有「願景」，再挾「土地儲備」之名，土地需求想要幾大就講幾大~
所謂「市民支持」建立土地儲備
黃偉綸指有85%市民支持建立土地儲備，乜真係咩？翻查公眾諮詢電話調查嘅問題，個85%支持係咁嚟嘅：「你支唔支持發展更多土地作為儲備，嚟改善居住面積同應付預見唔到嘅需要？」。呢個問法，猶如問隔離屋陳太「今晚食好啲好無呀？」人人都想改善居住面積，但咩叫「預見唔到嘅需要」，就語焉不詳。如果你同陳太講清楚，今晚要佢夾一萬億「加餸」，買九大簋，因為預見唔到個「肚餓程度」，你話陳太仲會唔會揀「同意」？政府《2030+》規劃文件其實寫得好清楚，東大嶼都會係為咗將大嶼山建設為連接大灣區嘅「雙門戶」，組成「西部經濟走廊」，配合「廣東自貿區」及「一帶一路」國策。但喺電話調查裡面85%市民支持嘅原則，係改善居住環境，而唔係配合大灣區發展！政府唔該講清楚咩係「預見唔到嘅需要」好喎。
有地唔用、畫餅充飢
政府怕咗新界佬，一向在處理棕土問題上歎慢版，今日聽到黃偉綸話「加快發展棕地」時我哋仲精神一振添。但真係只得一振，原來局長都學識咗做標題黨，之後講嘅內容完全睇唔到邊忽加快咗，除重申會推展各新發展區項目而裡面包含咗一啲棕地，其他喺新發展區外嘅成千公頃棕地就要今年年中先開始慢慢研究其發展潛力。至於本來應承2018年底完成嘅兩份棕土報告，包括現況調查及多層式工廈重置政策，就改口變成今年內完成。喂！舊嗰兩份功課都未交，就話新嗰份好快做好，叫人點信你呀！現成可用嘅170公頃高球場又夾硬打折，只局部發展32公頃。如果政府真係「急市民所急」，為何無視現有土地，放棄中短期內解決房屋問題嘅機會，而發明咁多新詞彙黎呃市民支持二十年後先有嘅「明日大嶼」？
參考文件：
立法會參考資料摘要 政府就土地供應專責小組報告的回應 （發展局，2019年2月20日）
立法會六題︰大嶼山的經濟發展和粵港澳大灣區帶來的機遇
《香港2030+跨越2030年的規劃遠景與策略》 概念性空間框架