立即捐款

本土研究社

由一群熱心關注本土發展及社會問題的研究者組成,開拓各種自主獨立的本土研究,推動民間知識生產與普及。 電郵:[email protected] FB:https://www.facebook.com/localresearch 網誌

政經

【劏完房又買劏場?】200億掃商舖,搵老人家嚟托咩!

【劏完房又買劏場?】200億掃商舖,搵老人家嚟托咩!
廣告

廣告

近年政府每逢想大開金庫益地產商有錢佬,例必擺老人家同病人上枱,填海又話為咗起老人院、覓地又話因為醫院床位唔夠,到項目落成就變晒天價私樓,老弱傷殘全部無份。今日嘅財政預算案又準備咗200億向一眾舖位商場投資者送大禮——話要用嚟買60個物業去增設社福設施,例如日間幼兒中心、長者鄰舍中心、學前康復服務咁話喎。

但我哋計一計,200億買60個物業,為起咪每個3億幾?!究竟政府諗住買咩物業咁貴?唔敢開名嘅政府消息人士就同《蘋果日報》講,「目標是在3年內,購入約60個3,000至4,000平方呎的空置單位」,咁樣除返開,等於呎價10萬蚊,簡直係銅鑼灣最旺嘅街舖價錢,長者一出門口就可以去金舖shopping,劏房波真係有心~

而消息人士對香港電台又有另一個講法,話政府嘅掃貨目標係空置商場。你估係有「生化壽司」嘅北角新時代廣場?定係死場死到開咗全球首個實境喪屍館嘅荃灣海濱廣場呢?老人家唔嚇得架喎,點解發展商經營不善變死場,就要由政府埋單?

33

搵唔到適當地方經營,的確係近年社福設施無法增加嘅因素之一,但源頭正係政府早年將啲屋邨商場賣晒俾領匯,一切以公司盈利為依歸嘅領匯當然會將無乜交租能力嘅社福單位趕走,搞到好多中心搵唔到地方開。而家政府又再花天價買返啲舖位返嚟,中間益晒嘅就係商舖投資者。

而講到死場,其實政府先係最大嘅死場業主。明明自己有逾830幅閒置官地同空置校舍供社福機構租用,可惜社福機構負擔唔起太多維修費,出租率極低;政府於是喺上年預算案話會批10億出嚟資助機構翻新。如果10億就夠維修,點解政府唔自己維修?偏偏又要另外花200億買舖再搵社福機構投標辦服務?出埋哩啲完全拋離市場嘅價錢,究竟係有心托市、定已經分好餅仔益自己友呢?

另一樣搵老人家過橋嘅仲有所謂「未來基金」,當年財爺曾俊華成立「未來基金」時,聲稱係因為「人口老化會對公共財政帶來持久挑戰 」,令市民誤以為儲哩筆錢係用嚟支付社福開支、照顧長者。實情哩個超過2,200億嘅基金只係為搞基建大白象工程而設,波哥今日仲宣佈改變投資方向,要用嚟「鞏固香港作為金融、商貿和創科中心的地位」,並交由團結香港基金副主席馮國經、副主席劉遵義、參事王冬勝等負責管數。

眾所周知,以董建華為主席、中港地產商組成嘅團結香港基金,近年力推香港配合國策發展成大灣區創科中心,甚至今份預算案亦都擦鞋擦到出面,話香港要「著眼於長期大勢,認清國家發展正處於戰略機遇時期」,結果成個「未來基金」就係將納稅人辛苦賺返嚟嘅血汗錢,配合國策倒去支持創科產業,實行「要錢有錢,要地有地」。

其實波叔嘅同事、財經及庫務局司司長劉怡翔都有提醒一眾迷信「創科經濟」嘅股民:「創科公司的回報可能很高,但風險亦大,需特別留意」。外國亦有研究話(註)九成初創企業往往執笠收場,而科技產業存活率更低。政府一味吹奏創科嘅高回報好似「穩賺」咁樣,拎納稅人啲錢嚟做高風險投資,試問一旦「未來基金」蝕咗錢、損手爛腳離場,香港人嘅未來又點算?

蘋果日報報導:200億入市購60物業 「死場」設幼兒長者日間中心?
香港電台報導:消息:預料3年內能完成購買60個物業提供社福設施
林茵、林芷筠:〈未來基金 — 讓基建掏空香港〉

廣告