立即捐款

政經

創科預算案無限Loop?!

創科預算案無限Loop?!
廣告

廣告

一年一度的財政預算案出爐,創科作為一個每年重點項目,其實真係好悶,對比去年的財政預算,其實就證明政府根本無做野,大部分都係翻抄舊年的budget 。

四大產業仲係度

四大產業係指生物科技、人工智能、智慧城市同金融科技。坦白講,筆者對生物科技真生物科技真係唔熟,不過其他三項真係有關注。政府對人工智能同智慧城市最出名的投資就緊係智能交通燈。其餘仲有智能身份證,同埋大量投資買入cctv監控社會,銅鑼灣嗰技捉垃圾蟲的360度cctv(真係好想知捉到幾多垃圾蟲)。政府投資人工智能同智慧城市早已是監控的代名詞。

金融科技又係一絕,希望大家唔好唔記得轉數快點樣轉晒錢俾騙徒,最近仲有SMS飛線我都未夠時間講評論。所以大嗱嗱1000億洗咗錢仲要害市民俾人呃錢,死未?

土地當科技投資

去年就預留200億去落馬洲,今年就55億數碼港5期。其實都唔想特別講乜野土地問題,不過數碼港的空置率有目共睹,好多公司甚至同科技無關,咁都叫創科投資真係得啖笑。何況點解做科技就要走到咁遠返工,南極數碼港同北極落馬洲都有,政府又吸引唔到外國大公司黎建立數據中心,Google都放棄咗咁多年,唔好呃人啦。

今年仲多咗個斗室計劃,即係科學園玩劏房,預你班IT人以為返7 x 24,唔使放工,有宿舍休息,聽講可以吸引人材來港。(點解IT人就等於自閉唔需要其他生活空間?搞到返工劏房二合一?)

人才培育

關於人才培育,其實我無乜特別建議,小弟出身於非正途培育的路徑(即係10歲開始自學programming ),唔識點培育人才。不過有錢唔等於有時間,見到「中學生」三隻字只諗起課外活動先搞,又或者係搞靚個電腦室同網站,甚至係你資優,係老師指名,俾選中的細佬,恭喜你,真係入行再講。

「為創科發展拆牆鬆綁」真係難聽過粗口

再工業化就講咗幾年架啦,真係唔見到有乜野工業生產綫搬入香港;科技券加碼係好的,至少尐老牌科技公司受惠(例如更新收銀機之類);至於「為創科發展拆牆鬆綁」真係難聽過粗口,搞創新或者引入創新科技唔俾政府告都真係偷笑。今年幾間共享單車執粒、Uber司機俾人告、Airbnb無得做。「創傷科技局」同「投資推倒署」嗰朵真係出晒名,財爺不如教下大家點樣先唔會俾政府告仲好啦。

其實預算案唔關IT人事

小弟作為一個前線嘅IT工作人員,就發覺成份財政預算案就完全唔關我事嘅;所謂嘅投資只係一啲城市監控、地產同埋生意人上嘅優惠。真正要保障創科發展嘅預算,一啲都無,例如保護知識產權、或者點樣鼓勵startup,其實政府一啲都冇做過,更加冇政策配合,所以我覺得與其靠政府搞創科,不如去外國搞完創科返嚟香港發展仲好過。

廣告