「阿強，你近排個樣咁愁既，你已經高薪厚職，又有未婚妻，愁D咩呀！」
「我上星期跟老細去夜場，搵左條女，搞左野，好似冇戴套！」
「有冇戴套都唔知？！」
「係呀！」
「咁我有冇機會瀨野架，會唔會感染愛滋病架」
「你最好搵地方驗下啦」
阿強係我認識十幾年既兄弟，中產家庭，一直毫無牽掛，FIRST HON畢業後係投資公司做，幾年間已經升到經理級，又有高學歷、高薪既未婚妻。而我同佢一齊畢業後，只係「蚊型」NGO入面既小小文員，仲要日日忙到八、九點收工，埋數未停過，完全冇哂自己生活。
直至一個月前，我與阿強出街食飯時，講左「上星期同條女無戴套搞野，驚瀨野」。如果發生係中學、大學時期，一定會「問都唔問」，直接取笑佢，「肯定係叫雞啦」，然後先幫佢諗如何處理。
眼見阿強帶著無數的憂愁，非常擔心感染愛滋病。他有一刻想向未婚妻坦白，但又擔心關係會破裂，後果不堪設想。
阿強的故事，或只屬冰山一角。男士們一向予人堅強，靠自己解決問題，以致遇到任何困難，都喜歡自己解決。去年上映的《逆流大叔》正正刻劃男士，特別是中年男士，不敢向其他人表達所承受的工作及家庭壓力。
阿強不是一位中年男士，只是一位剛脫離稚氣不久的成年男人，同樣也會面對工作、家庭問題，都會令他難以啟齒，更何況是一種帶有負面標籤的疾病? 當然，我亦不建議阿強現階段向未婚妻「自首」，始終仍未進行任何愛滋病及性病測試，未知會否真的感染。
飯後，我SEND了WHATSAPP給阿強，提到可以做愛滋病檢查既地方和機構，希望阿強可以快些知道自己有否「中招」。最初阿強抗拒做檢查，好驚真係「中招」，作為老死，其實都無什麼可以幫到佢，都係話「做下檢查都好」，之後我都沒有再問佢太多。
在我幫他搜尋資料過程中，才知道香港有超過八成個案係透過性接觸而感染愛滋病病毒，七成人係曾經發生低／無風險性行為（有戴安全套），但感到憂慮，又有近兩成人感到絕望／萌生自殺念（(關懷愛滋, 2018）。原來，對性無知是咁可怕，令人增加無畏的擔心，影響精神健康。
一個月後的今日，我又同阿強約食飯，
「你係愁得正常，其他人有戴套都驚」，
阿強：「無套陰道交／肛交係高風險行為，有機會感染愛滋病／性病」。
阿強補充：「我檢查左啦，冇感染愛滋病和性病，不過最好再係發生高風險行為後90日內做多次檢查，會更好」。
我發現阿強面上少了愁容，但腦袋多了安全性行為知識。
阿強最終有無感染，阿強和我都未知，但看到佢少了近期的愁容，作為兄弟的我都暫時鬆一口氣。
阿強話，以後不再飲醉啦，真係好易出事。
成年男士，好似阿強，缺乏正確性知識未必是個別例子，主因是教育制度沒有列明「性教育」的重要。現時中、小學只按需要跟隨《學校性教育指引》教授性知識，教授內容又廣闊。2011-2012學年，只有七成二的學校曾經提供愛滋病/性病教育(2018年立法會文件)，在沒有充裕的學習時間，在坊間接收不同來源的性知識只會非常普遍，謬誤(包括錯誤的風險評估)亦會更多。試問在這個情況下，當青少年長大後，類似阿強的故事會否再次複製或者已在複製中?
我衷心希望香港的性教育可以行前一步，避免阿強的例子再臨。