陳茂波豪拋200億要買60個商場鋪位，昨日勞福局局長羅致光出來掩護，話200億只買全港樓面面積0.1%，唔算係托市。既然局長一心要做大茶飯，目光咁遠大，大家都不如幫下眼，睇下200億買到邊啲乜商廈，話唔定建立到個商廈改建成嘅世界級安老地標。
-大新金融中心：200億可以足足買到兩次，距離灣仔地鐵站3分鐘路程
-美國萬通大廈：承惠125億，做日間中心優勢係可以享受到維港兩岸嘅幻彩詠香江
-合和中心：163億就ok，入住嘅公公婆婆最開心係做完保健運動可以上頂樓食旋轉自助餐
以上成交價已經係前排中資大舉湧港，狂掃商廈創下最高成交價或者係樓價高價的估值。近排中資退潮，2019年頭2個月工商鋪位成交先有259億，陳茂波一鋪已經差不多係個幾月全港嘅成交金額，慷公帑之慨，無人買就帶頭高位接貨！？
其實借公公婆婆過橋，話買鋪來比老人家做日間中心，都唔好做得禁肉酸啦。明明政府唔洗錢都已經有90公頃閒置GIC用地喺手，參考將會喺啟德落成嘅日間護理中心服務呢就可以到60位老友記，都只係1,200萬，200億足足起到1,666間。
土地大辯論明明日日講緊商業空間不足，硬銷要起個東大嶼人工島，政府有地唔起社區中心，走去同民間爭地方用？難道陳茂波嘅理財新哲學就係高買低賣，商鋪歷史高位就心急接貨，空置GIC地曬太陽或者偷偷賣地起豪宅。