給立法會既職員：
為五斗米折腰，大把打工仔咁做。為五斗米出賣香港人？咁就唔好話自己只係「打份工啫」！
立法會議員近期為逃犯條例連場大戰，保皇黨之所以開得成會議，大把立法會公務員有份幫手準備會議、分發文件、保護議員……咁多打工仔落手落腳一齊促成條例通過，如果保皇黨係吹鷄跪低既狗，好遺憾……你哋都差不多，只係披住「政治中立」既假面具，每個月有錢落袋，再埋沒良心既事都照做咁解。
如果你話，我唔識政治架我乜都唔識！咁……吓？近年立法會越來越多爭拗，班保安都頻頻上電視，你真係淨係睇cctvb架？你睇到平時「唔係咁」既胡志偉議員今次都發咗顛咁，你唔覺得奇怪架？無動於衷打份工？仲有咁多巿民嚟抗議...咁你可能唔係無知，而係選擇麻木……
如果你知發生咩事，但繼續「打份工」啫，可能你有家要養、有樓要供、有病要花錢睇醫生...但係你又知唔知，醫學界都淪陷緊，第時你就算有錢睇醫生都唔知係咪庸醫，仔女打疫苗飲奶粉都隨時瀨嘢中毒，你到時先開始維權，隨時俾人屈你罪名、送返大陸受審。無人知自己喺邊度出事、幾時需要維權，亦唔會有人知有咩下場……把港人送進內地黑暗司法機關既隨意門，今日就係你有份打開。
更何況，你要供樓，我哋唔駛供？你有父母要養？嗰啲仲踎緊監既政治犯無父母咩？香港越係大難臨頭，大家越唔能夠太過自私，打份工……打工仔都要有骨氣啊！
過往唔少勞工行動都會遇到基層保安員，有時我哋都唔想佢哋太難做，畢竟冤有頭債有主，大家都係無權無勢，之但係今次一齊參戰既，唔只基層喇掛，亦唔只保安，但不論你身處咩階層，相信都唔係關鍵時刻助紂為虐既藉口掛？
好快又到六四，除咗悼念死難者之外，其實年年都好多人思考點樣延續八九民運精神，大家一年365日有咩可以做，最近立法會秘書處黃女士個記招又啟發咗我，你唔需要係黃絲、民運人士，只要你唔肯講大話，大是大非時刻肯企出嚟講真話，對民主發展都已經係好大貢獻！話時話，好多人喺八九民運前，又邊有黃絲藍絲之分，一個大浪捲來，嗰一刻，你決定挺直腰桿做個正直既人，就係抵擋呢個年代帶俾大家既風暴。北京政府唔會突然把坦克駛進彌敦道，但佢喺各界別既上中下層爪牙、政策禍害，以致科技資訊上既審查監視已經越來越深入，咁何嘗唔係另一場慘烈既長期抗爭早已開始？難道你仲想「打份工啫唔好為難我啦」...？
勞工組常言道：工人唔係話炒就炒，但其實，工人亦唔係話跪就跪啊！
打工仔……要有價值、有尊嚴啊……
附：
怪譚一則：立會倀鬼驚魂
明《研廛筆記》描述了一種鬼怪叫做「倀」，倀雞英個「倀」。
倀鬼本來係好地地一個人，不幸俾老虎食咗，唔知點解俾老虎食左，變左鬼之後，倀鬼就覺得自己永遠都要依賴老虎維生，只要老虎叫到，就真係乜野惡事都做得出。試過有個老母變左倀鬼之後，離譜到報夢呃X個仔話山上有金執，等佢上山俾老虎食.......嘩，頂！呢招真係仲毒過逃犯條例。
好彩個仔冇中計，最後仲同老豆一齊打x死隻老虎。喂，阿哥，唔好以為倀鬼只係存在喺D古籍度，而家仲有一大班喺立法會度呀仆佢個街........