（獨媒特約報導）漁護署正就《防止殘酷對待動物條例》修訂進行公眾諮詢，有意見指應擴闊條例涵蓋範圍，納入表演動物，例如在海洋公園被圈養、被逼表演的海豚。本地動保團體連續七年舉行「Empty the Tanks」示威行動，要求海洋公園停止動物表演及困養動物。現時多個國家，包括英國、印度、瑞士、巴西，均已立法禁止圈養鯨豚動物。釋放海豚，實為國際大勢所趨。
被困在公園的海豚，經歷在野外被捕獵、人工繁殖、表演訓練，身心受壓。海洋公園同時推廣減排、減廢等環保概念，但香港海豚保育學會會長鄭家泰認為，「如果要犧牲海豚嘅自由，令佢哋出現咁多精神同健康問題，至換到一啲咁基本嘅環保訊息，我哋覺得個代價太大。」更重要的是，動物表演為下一代帶來錯誤的保育訊息，「令人以為人係有權困住動物嚟觀賞，甚至有權訓練動物為人類表演。當小朋友學到呢啲錯誤訊息，佢哋去到野外，都會覺得人係凌駕於動物之上。」
日本漁民捉海豚供水族館 「唔啱用」即場被屠殺
香港海豚保育學會關注海豚權益多年，鄭家泰認為野生及圈養海豚的保育互相影響，並指出圈養業使海豚保育更加「難做」，「大眾好多時攞到錯誤訊息，覺得人係有權控制動物，咁對於野外海豚保育而言係一個阻力。帶生態團嘅時候，好多小朋友會問可唔可以餵同摸海豚，都係從圈養動物攞到嘅錯誤訊息。」
《海豚灣》截圖
鄭家泰指出，國際間不少水族館的海豚都是從野外捕捉，漁民會傾向捕捉年幼雌性海豚，「因為無咁有攻擊性，方便訓練」。其中日本和歌山縣太地町更因過度捕捉海豚而「揚名國際」，鄭家泰指，當地漁民每月會捕捉約200條海豚供水族館之用，而如果海豚年紀太大、太野性、或身體有缺陷，皆會被水族館視為「唔啱用」，即場被殺。當地漁民大規模獵殺海豚的過程，被生態保育者拍成紀錄片《海豚灣》，獲得2010年奧斯卡最佳紀錄片。就算能避過獵殺，海豚亦難逃家庭被拆散的命運，「因為海豚年紀太大已經有野性，所以（漁民）通常都唔會要海豚媽媽」。
海豚保育學會到日本領事館請願。（受訪者提供圖片）
石屎缸內長大 海豚媽媽不諳養育
海洋公園現時圈養約25條印度太平洋瓶鼻海豚。鄭家泰指，園內第一、二代海豚都是從日本、台灣等地進口，而近十年的海豚則是由人工繁殖。
人工繁殖的弊處，在於在魚缸長大的海豚母親，失去野外承傳的養育技能。「海豚媽媽本身都係喺圈養環境出世，無機會（在野外）學習湊BB嘅技巧。甚至海洋公園都承認，海豚媽媽Pinky唔係好識湊BB，令到Cleo（上月在園內死去的幼海豚）嘅行為有啲唔正常。」人工繁殖下的海豚較難得到母親的適當照料，間接提高幼海豚的死亡率。除Cleo外，海洋公園歷來都發生過不少幼海豚死亡事件，惟園方一直不公開動物的傷亡報告，以致海豚死因不明。
今年5月11日舉行的「Empty the Tanks」示威行動。
海豚受訓 承受巨大精神壓力
鄭家泰指，水族館通常用正增強法（positive reinforcement）來訓練海豚，「喺海豚唔太飽嘅情況下訓練，做唔啱就唔畀嘢食」。海洋公園的前訓練員亦曾向傳媒透露，公園會以「連坐法」訓練海豚，即一條海豚做錯動作或不聽指令時，會連累其他海豚沒有食物。這種方法容易俱使動物之間互相攻擊，「因為海豚好聰明，佢會諗自己無做錯嘢，點解會無嘢食？」，「外國某間有殺人鯨嘅水族館，曾經有其中一條殺人鯨覺得其他同伴唔好（不聽訓練員指令），就去攻擊、甚至係咬死佢。」
亦有海洋公園訓練員向他透露，指園內某些舊派訓練員會用懲罰方式訓練海豚，曾出現打動物的情況；某些訓練員甚至會以浮物鋪滿水面，使海豚難以上水呼吸，從而逼使牠們聽從指令。「因為海豚好聰明，佢哋未必次次都聽你指令，就算用食物都未必咁順利」，舊派訓練員未必懂得適當的訓練技巧，「有時當佢哋忟憎就會咁做（懲罰式訓練）。」
鄭家泰亦指出，海豚與人類一樣，被逼工作會引致精神壓力。海豚受訓時，血液壓力指數會升高，有機會襲擊訓練員，「聽過好多（海洋公園）訓練員講，有好多海豚攻擊訓練員嘅案例，海豚會咬或者撞埋嚟。根據動物行為學估計，動物或者被圈養得太耐，好多時佢哋嘅精神狀態都比較差。但海洋公園唔會公佈海豚攻擊訓練員嘅情況，所以公眾係會完全無聽過。」
2013年，海洋公園海豚Pinky在魚缸內「撞牆」，以鰭尾猛力撞向池邊再翻身直插池底。專家指牠精神受壓，以致出現自殘行為，惟園方解釋指Pinky純綷「貪玩」。
（海洋公園網站圖片）
被困水族館營養單一 靠胃藥吊命
有生態學家指出，大多數鯨豚類是群居動物，群居的瓶鼻海豚更會分擔不同角色，合作獵食；而在人類捕獵海豚時，海豚會因為同伴被捉走而感到極度悲傷，亦會因此影響群體其後的獵食能力。（註1）
鄭家泰指，海豚合作獵食的方式是一種文化傳承，而且海洋裡的食物較多樣化，營養較豐富。相反，在圈養環境內，海豚只能食冰鮮魚，一來不夠新鮮，二來營養來源單一。鄭指，故此受困養海豚通常要依靠營養保充劑維持生命，而某些海豚因訓練而精神受壓，亦會致使消化系統發炎，需要食胃藥來「吊命」。
要求海洋公園訂「釋放海豚」時間線
香港海豚保育學會向海洋公園提出四項要求，包括即時停止海豚表演、停止人工繁殖、停止訓練後改善圈養環境、以及研究於海灣野放海豚。鄭家泰認為，海洋公園應就以上「釋放海豚」的步驟訂立時間線。
韓國濟洲就曾於2013年及2015年野放5條瓶鼻海豚。該批海豚被非法捕捉，繼而放進濟洲水族館，其後遭到團體反對，並將事年推上法庭。法庭最後判決水族館需要野放海豚。而其中一條海豚Sampal甚至在野外擁有自己的下一代。
不過，海豚在魚缸長大，能否在野外環境生存？鄭家泰認為，就算不能野放，起碼應以圍欄圍起選址適當的海灣，讓海豚餘生在海灣居住，「起碼海灣嘅體積比魚缸大幾百倍」。他又認為，就算海洋公園沒計劃野放海豚，亦應立即停止海豚表演，「如果要keep海豚喺入面（魚缸），都希望唔好表演、唔好繁殖，當佢哋到老死亡，件事就完結。」停止表演後，海豚仍然有約十多年生命，鄭家泰認為，海豚訓練員雖停止訓練，但亦應繼續與海豚有適當互動、交流，使海豚在魚缸內的生活不至於過份沉悶，「因為海豚唯一有嘅就係訓練員，佢哋最信任就係人類，雖然好可悲，但係事實。」
動保人士到海洋公園保育基金慈善跑活動抗議。（受訪者提供圖片）
學習動物知識理應有更好方式
圈養動物能否為公眾帶來保育訊息？鄭家泰對於「海洋公園保育基金」尤其反感，「一邊話減少用塑膠，一邊金主係圈養緊動物，啲動物喺野外捉返嚟，其實係破壞緊生態。」他亦十分質疑海洋公園的教育成效，因為當中含有誤導成份，「（錯誤訊息）例如人係凌駕於動物之上、人係有權去困住動物，甚至可以訓練表演畀人睇、海豚可以食死魚」，「當下一代小朋友學習到呢啲錯誤訊息，佢哋出到去野外，都會覺得人係凌駕於動物之上。」他指出，自己帶生態團時曾有小朋友問：「係咪可以叫海豚過嚟？係咪可以餵海豚食魚？」這些都是圈養動物帶出的錯誤訊息。
鄭家泰續指，公眾如想學習動物知識，理應有更好的方法，例如參與生態團，「好多時公眾覺得去到水族館先見到動物，其實喺野外都見到，而唔需要捉佢哋返嚟。」除此之外，現時科技發達，他指出大眾可在網上找尋動物紀錄片，或參觀3D投影的動物展覽，這些方式比起困養動物更能帶出正確的保育訊息。
現時多個國家已成功淘汰困養海豚業，包括英國、巴西、波蘭、挪威、印度、瑞士等；而智利、哥斯達黎加，及美國多個州份，亦已立法禁止水族館展出鯨豚。
海豚保育學會在復活節期間舉辦「Free D鯨豚互動展」，以投影技術將鯨豚重現眼前，與參加者互動。
註1：Gazda, S. K., Connor, R. C., Edgar, R. K., & Cox, F. (2005). A division of labour with role specialization in group–hunting bottlenose dolphins (Tursiops truncatus) off Cedar Key, Florida. Proceedings of the Royal Society B: Biological Sciences, 272(1559), 135-140.
記者：陳康麒