今朝一起身，嘩，好多人鬧張超雄。嗱，鬧唔係問題，但發覺好多提問，原來都搞錯了一些基本概念。希望大家鬧之前，再睇多次個flowchart，明白個程序先。 睇完未？睇完就再講個「超雄方案」。
1. 張超雄想搞乜？
解決陳同佳案，將林鄭軍，等佢冇得再講初心乜乜乜。
大家睇完個flowchart，應該理解到現行法例入面，要將疑犯由香港移交去第二個政府，係分長期協議同個案形式。而無論長期協議同個案，都 1) 要經立法會，同埋 2) 唔包中華人民共和國。政府原本個建議，係個案唔洗經立法會同埋包中華人民共和國（所以包台灣）。大家一路反對緊的，係政府呢個建議。
咁「超雄方案」呢？現行法例乜都唔改，只係改一條：將唔包「中華人民共和國」變成唔包「中央人民政府或澳門政府」。換言之，台灣政府就得。
如果通過咗「超雄方案」，就可以由台灣政府提出，然後香港政府同立法會審議，再然後送疑犯去台灣，in this case陳同佳。
2. 台灣咪話咗唔受囉？
台灣唔受的係政府方案，因為政府方案將台灣當係中國一部分處理。「超雄方案」同政府方案響呢方面剛剛相反，攞走現行法例中矮化台灣的寫法，對台灣係好事。
3. 會唔會變成幫政府捉去咗台灣的手足？
唔會。首先，條例係處理緊香港送人出去，唔係台灣送人來香港，出同入係兩件事來的。
而如果台灣要送香港手足返香港，得兩個可能：1) 手足響台灣係訪客，咁台灣其實從來幾時都可以驅逐佢出境，唔關香港法例事；2) 手足響台灣入咗籍，咁更加唔可能，因為台灣本身有政策唔會送自己居民出去，亦唔關香港法例事。
4. 台灣有死刑，送人去台灣係咪合理化日後可以送人去有酷刑的國家？
唔會。現行法例寫明，送人前當地要保證唔會尋求死刑，去全世界邊個國家都係咁，而呢個保證亦要經過香港立法會審查。
5. 佢好心地姐，但係建制派可能會改佢個修訂，改到面目全非呢？人地票數多喎！
張超雄到時可以成條草案撤回，咁建制派在選民面前會變成真真正正導致不能解決陳同佳案的黑手。（大家真係要熟讀會議規則呀！）
6. 點解呢個時候先提？會唔會幫咗林鄭？
點會？林鄭咁鍾意講初心，就用初心將佢軍囉。建制派咁鍾意講守法，就迫佢地響法律面前表態囉。
講好兄弟爬山，用立法會迫對家自相矛盾都係爬山方法的一種。大家可以對不同爬山方法有不同意見，好應該互相提點，但記住唔好切割呀⋯⋯
再睇多次四月份解釋政府方案的flowchart