林鄭真係高分低能嘅代表——我諗好多人讀書冇林鄭咁叻,但好多人都唔會好似佢咁白痴。
當日本人已分析過,硬推逃犯修訂,最初唔係中共的想法,因為陳同佳案係突如其來,冇人能夠預料,呢啲芝麻綠豆嘅兇殺案,應對緊美貿易戰和國際圍堵嘅中共高層根本唔會咁得閒插隻手嚟管,但特區政府係諗緊辦法嘅時候,有啲smart ass覺得可以藉此搞送中取悅主子,於是向中共獻計,咁中共當然好高興,因為搞得掂佢又開心,搞唔掂死嘅係你班友啫。到咗今日,我諗呢個假設越來越清楚係啱嘅。
但係呢個送中條例,基本上全港都會受害,諗唔到有任何人得益。你話搞大白象基建,搞明日大嶼,都有班利益集團可以從中掠水,搞送中條例,究竟邊個會得益?完全係諗唔到。這兩個月更證實,你就算奉供守法都可以送你中,例如你出席過一個合法遊行,上到大陸過關都會被扣留,而你係唔會求助到。呢一點只有啲唔熟悉中共手法嘅人先唔覺——其實睇過國產凌凌柒都知。
件事喺六月,引發軒然大波,一百萬人上街,二百萬人上街,反對比例前所未有咁高,搞到有人為此輕生,就係死都唔撤回,所有香港嘅持份者(特區最愛講呢樣嘢)包括總商會、跨國企業、各國領事館都反對,都係唔撤回。如果,呢句「撤回」係呢個時候講,相信暑假已風平浪靜,天下太平。就算經歷了612,只要即時講撤回,唔用暴動罪告人,仍然大有轉機,但林鄭仍然好寸咁出嚟只講暫緩唔撤回,連最後轉機都錯過了,走已無回頭路。
於是事件就不斷發酵,去到721出黑社會元朗恐襲,甚麼也回不了頭。繼後警察的瘋狂行徑已不必細表,至此已變成時代革命的問題!深仇已結,才扮死狗咁預先錄影講撤回,以為仲有轉機,完全係白痴。
誰會想到,林鄭一個人的傲慢堅持,會弄至今日如斯田地?香港整個特區管治團隊近乎全廢,民望沉底,零公信力,只能靠龐大的公務員團隊維持基本功能,大腦已進入半休眠狀態。同時,在林鄭的強烈輻射影響下,細胞紛紛異變,壓抑已久的壞細胞開始成為惡性腫瘤,本來看似正常的警隊,急速變成癌細胞,成為如今香港最大的危害。由於癌症爆發,身體正全力抵抗,其他本來被壓下的隱患也爆發出來,包括暗中幫助警癌的黑社會。去到呢個時候,唔做化療唔做切割,剩係話「撤回不健康的飲食習慣」就妄想可以復原?真係好天真。
現在香港的處境真是開埠以來最脆弱但又最微妙的境地。正值中美新冷戰,反送中和香港人勇敢抗爭、在抗爭中表現的質素,令香港成為國際焦點,大部分民主自由陣營的國家都站在香港一邊,只有極少數極權國家站在另一邊。微妙的是,香港既不是棋子,也不像人質,即使香港牢牢在中共手中,成為一個焦點,但民主陣營固然不想硬來將之打爛,就算中方其實也不想將之摔破(不然一早已派解放軍)。
結果如何,真是天曉得。但這已是香港抵抗極權的最好時機,五年前的雨傘運動完全沒有這個大環境。還是那句,只有勇氣與堅持,才能見到曙光。
香港人,加油!

