立即捐款

值得恐懼的就是恐懼本身

值得恐懼的就是恐懼本身

我昨天轉傳一個「榮光不熄」行動的資料,眨吓眼有人話係鬼,唔好行動。

首先講吓,構思呢個行動嘅人,絕對絕對唔會係鬼,佢哋唔係勇武,但喺呢場運動投入嘅資源和行動,我敢講多過好多和理非。佢哋嘅原意,只係為大家打氣,等於好似獅子山條人鏈咁,營造一個畫面,告訴世人大家追求民主選舉嘅決心,通宵等候一早去投票。同所有行動一樣,你去唔去築人鏈,你嗰晚開唔開燈,悉隨尊便,從來冇強迫,或指你唔參加就係鬼。

咁依家廣傳緊點解唔好參加呢個行動嘅原因,主要有兩點:

(1) 咁會幫忙民建聯配票

我明白好多人之前係唔關心政治,對政制唔熟悉,唔緊要,慢慢pick up,我只係奇怪點解會有啲幾有份量嘅時評人會forward呢一點。依家唔係立法會選舉,唔係比例代表制,係區議會選舉,係勝者全取,點樣配票?我唔明點解好多人會保留呢點叫人取消行動仲話人係鬼。

(2) 順手畀對家影相知道晒黃色家家庭分佈同地址

係,咁你驚唔驚?你驚?咁你咪自製白色恐怖?件事未發生你自己先令自己墮入恐怖,你仲好意思鬧人製造白色恐怖?你們本身就是一個易於恐懼的民族,咁我覺得你都唔使點同中共再鬥落去。

我覺得,當咁多前線去咗食TG,捱棍擋子彈,有很多黃店表態,有好多人冇戴口罩去黃店排隊,好多人即使有蒙面法也唔怕濫捕照出去,有好多人用自己架車掛住個真車牌出去接放學,仲有好多好多好多人喺不同嘅層面為時代革命做緊嘢,然後你話「嗰晚開盞燈?好L驚呀,唔得」,咁我其實冇嘢好講。只係見到有不少望落都幾硬淨嘅人,竟然都forward呢段嘢,咁其實乜都唔好做,其實出嚟做乜都會有後果,所以你以後唔好着黑衫,因為你會畀人影相,鄰居和大廈管理員會知道你係黃家庭;以後食Lunch唔好去黃店,因為都有機會畀人影相,知道你喺邊區返工;叫人唔好做黃店,因為會知道晒黃店分佈同畀人搞,畀人搞過好似渣哥咁應該快快轉藍;叫學生乖乖聽楊潤雄叔叔話,唔好再參與政治運動,因為你哋咁樣會畀人知道黃學生的分佈,以後呢間大學、中學的學生冇人請。

驚,咪唔好出嚟囉,點解大家對呢句嘢咁大反應?因為著黑衫、做黃店、參與政治、出街,有好多嘢,本來係你嘅權利和自由,而唔需要驚,包括晚上開盞燈,表達你的政治態度。所以,以後唔好再懶有型咁引羅斯福句名言「我們唯一值得恐懼的就是恐懼本身」,羅斯福知道你引用呢句名言但連盞燈都唔敢開,佢會笑到復活。

參唔參加,悉隨尊便,驚,咪唔好開燈囉,但唔好話人係鬼就OK了。