早排政府計劃拎19億「新疆嶺」平整反恐基地、機場又拎18.6億起機場警區行動基地,反恐無底線,今次我地又發現原來政府已經同步靜靜雞「新疆化」緊香港成個監獄基建系統。
今年年頭,當社會集中關注緊國歌法同修訂逃犯條例個陣,懲教署自己在2月開左個記招【註一】,展示落實「智慧監獄」初步成果,公佈左原來已經開展左兩個「智慧監獄」試點,將一種名為「智慧手帶」、「影像分析及監察系統」等監控科技植入左監獄系統裡面。當時引進高科技既理由係有助「提昇管理效率」、「防走犯」同「防止自殺」包裝,減低公眾既敏感度,就令「智慧監獄」過左關冇人再理。
「智慧手帶」係乜?配備左可追蹤在囚人士實時位置嘅功能,一旦戴上就唔可以自行除下,只要稍為偏離原訂路線,或者心跳節奏唔同左,系統都會即時通知懲教人員【註二】,係名副其實現代版「金剛圈」。講得好聽就用黎防自殺,但更重要係可以收集到在囚人士既行為、地理移動及心理狀況等私隱數據,政府理論上就可以掌握到唔同類型既人既習性同驚啲乜。
「影像分析及監察系統」又係乜?唔單只係防止逃獄及打鬥【註三】,而係可以透過人臉辨識技術,實時分析你眉頭眼額動作表情,再併埋「智慧手帶」既數據,綜合起黎理論上就更精準預測到咩樣代表咩情緒反應,監控範圍依家連廁所同沖涼房都唔放過 (政府聲稱會在視頻上遮蔽私處)。
查翻應科院網頁,可以發現有間叫「天地陽光通信科技」既北京創科公司,過去曾協助懲教署研發左個「智慧視頻監控平台」,用黎實時處理獄中海量監控視頻 【註四】。即係話,過去監獄裡面既影像已經有可能一直經呢個平台俾左大陸。究竟未來既監獄大數據,會唔會送中配合大灣區智慧新警務合作? 暫時亦係個好大問號。
智慧監獄係為左防走犯所以有需要? 懲教署自己都承認過去11年都冇試過有逃犯【註五】,根本唔能夠成為合理化攪「智慧監獄」既理由! 亦有議員指出過,要保障安全根本唔需要過度科技既監控。【註六】
現時香港成個智慧監獄基建可以做到既監控功能,基本上同中國(尤其新疆)近年同步攪緊既「智慧監獄」已經好類近。新疆監獄直情不只運用嘅監控科技例如人臉識別技術,而且還有「人臉情感人工智能」等,可以實時監察在囚人士活動【註七】。雖然所謂「情緒辨識」 (Emotion Recognition) 技術效果一直成疑,但中國官員已經在2019年11月承認在新疆正式應用【註八】,發展緊「讀心術」既人工智能人類社會偉大實驗。
所以新疆再教育營/監獄最可怕之處,唔係單純強制你學普通話唱紅歌,最恐怖係捉你入去毫無私隱收集緊你生活上所有行為及生物數據 (biometric data),再從行為大數據推演出咩人有咩行為諗緊乜、將平民當「潛在恐怖分子」分等分類實時監控、咩人會有潛在反抗意識等,最後做到「預防性反恐」。所以中國模式既數碼監控監獄扮演著一個關鍵角色,從監獄開始監控,最終複製到成個城市都變成一個大監獄,人人自危。
事實上,今年4月另一份中國官方內部文件《關於加強和改進監獄工作的意見》亦首次透露,習近平新時代的監獄「始終把維護國家安全和維護社會穩定作為監獄工作的首要任務」,亦提到「運用大數據、物聯網、人工智能等現代科技手段,加快建成標準規範科學統一、數據信息全面準確、業務應用靈活普及、研判預警智慧高效的『智慧監獄』」【註九】。呢幾年中國大城市攪智慧監獄如後雨筍,香港同國家戰略夾得咁天衣無縫,一定唔係被規劃啦。
同呢幾年中國大城市都攪智慧監獄一樣,其實特區政府於2016年開始提出【註十】,2018年4月懲教署成立反恐專責組,到年底保安局考察新疆反恐設施時懲教署亦有代表隨團,在解釋為何懲教署反恐都要反到去新疆,政府回應「若要有效地支援紀律部隊在反恐及不同方面的多元執法,有關部門必須參考其他地方的經驗和最新發展...... 懲教署亦參照外地經驗,加強在獄中的反恐活動工作等」【註十一】。考察完成,今年2月就公開展示「智慧監獄」初步成果,配合著成套國家戰略黎改造香港既有監獄功能,亦都係呼之欲出。
按保安局立法會文件,未來政府如無意外會於香港所有監獄同收押所全面實行智慧監獄,今年即將會開展新一輪「資訊系統策略研究」,分短、中、長期配置更多創新及科技項目 【註十二】。依家好多人關注既新屋嶺同荔枝角收押所,一係就冇CCTV一係就超多死角位,裡面發生好多性侵打死人指控。但當日後「智慧監獄」全面落實,未來冇cam又死有哂cam重驚。到時候,在大陸做開智慧監獄生意既中資國企 (當然唔少得唔介意配合數碼極權既創科企業),就真係賺到笑。
大家真係唔好以為智慧監獄剩係會影響在囚人士權益,依家已經上5000個香港人因反修例運動被捕過,未來都會面對著呢種風險。而且當智慧監獄變成日常,周街濫捕手足就唔只係為左恐嚇,而係可以實現好似新疆再教育營做收集「異見人士」行為及生物數據,更加令政府有誘因濫捕更多示威者,捉得愈多愈好,最後這些大數據亦都隨時可配合其他智慧城市監控基建 (如智慧燈柱、智慧警務、智能身份證) 作日常數碼監控,到時就正式進入蒙面都防唔到監控既瘋癲時代,大家真係要合力睇緊啲未來既撥款同進展!
---
參考資料:
【註一】立場新聞:囚犯日後或須戴電子手帶 智慧監獄設三大系統作高科技監管
【註二】立法會CB(2)529/18-19(05)號文件
【註三】立法會CB(2)1100/18-19(05)號文件 P.5
【註四】香港應用科技研究院:智慧監控視頻分析技術平台
【註五】政府新聞網:懲教署發展智慧監獄系統
【註六】立法會議員邵家臻 與「青少年囚犯人權關注組」:對懲教署大幅裝置「影像分析及監察系統」閉路電視(CCTV)的聯合聲明
【註七】新疆維吾爾自治區監獄管理局網:新疆烏蘇監獄被司法部命名為“智慧監獄示範單位”
【註八】Financial Times: Emotion recognition is China’s new surveillance craze
【註九】寒冬:祕密文件曝光 中國迎來習近平的「智慧監獄」
【註十】立法會CB(2)949/15-16(07)號文件
【註十一】立法會討論文件:2018年4月懲教署成立反恐專責組
【註十二】立法會討論文件:懲教署「智慧監獄」的發展

