立即捐款

藍思明的奇妙經歷

藍思明的奇妙經歷

大家好,我係藍思明,我今日飛咗入元朗啦,原來諗住可以開開心心輕鬆兩日,點知喺西鐵站發生咗一段小插曲。

話說我今次去元朗係參加一個朋友嘅喪禮,所以着咗黑衫。着黑衫驚唔驚畀人打?唔驚,因為警隊服務一向非常專業,有咩報警咪得囉。

講返正題先。我去到西鐵站,見到有過百個白衣人喺度打啲市民,咁我自己又着黑衫,好驚,於是我打999報警。

我打咗一次,好耐都冇人聽。於是我睇睇個電話,點解999都會冇人聽嘅?唔緊要,我再打過,點知又俾人cut咗線。

之後我打第3次,今次我就刻意望吓周圍會唔會睇到究竟發生咩事,終於俾我睇到啦,原來有兩個警察,應該係收到call嚟到,竟然喺天橋嗰邊熄咗個對講機,然後就擰轉面行開咗。佢哋係完全冇問過我有咩需要就行開咗,我想叫都叫佢哋唔住!

其實我好明白警察嘅工作係非常忙碌,有時候會唔覺意miss咗都唔出奇,特別係元朗呢啲官商鄉黑嘅地方,因為佢哋要照顧大量同路人所以我都好體諒,但當我一而再再而三被忽略嘅時候,加上我親眼見到嗰兩位警員嘅行為,我開始明白事情可能並唔係我想像中咁簡單!

跟住我再㩒第400次,終於有人聽咗個電話,我話呢度有人打人,講完我諗諗頭先發生嘅事,我覺得有需要同警隊嘅高級警員表達,因為我唔希望呢種不快嘅事情會發生喺其他人身上。

於是我同佢敘述返整個過程。佢竟然話:「驚你就唔好出街。」

我好唔開心,我覺得要同佢哋嘅高層講。過咗39分鐘,我終於見到一個八鄉嚟嘅指揮官,我係咁同佢講返件事出嚟,問佢點解你啲同事會咁遲。佢大大聲話:「遲唔遲呢我唔知,我哋係收到call嚟嘅。我睇唔到錶呀,Sorry呀!你見唔見到頭先都幾亂下㗎?見到㗎可?如果見到你就知啦,我哋點會有機會可以睇錶呢?」

我向佢表示其實我只想反映件事,希望呢種事情唔會發生喺其他乘客身上。

佢跟住同我講:「你咁樣係唔會令到我驚㗎!」

佢絕對係一個非常專業嘅仆街,我都想喺呢度同佢講聲X佢老味(好後悔冇問佢叫咩名)

我講件事出嚟係希望警方可以積極處理類似嘅問題,因為作為全港擁有龐大武力、維持全港治安嘅紀律部隊,發生咁嘅事情實在係令我好驚訝。

如果警方嘅高層想了解更多關於這次事件嘅詳情,歡迎睇多十次鏗鏘集、Now 經緯線及各大傳媒新聞片段。

我轉頭會將當日元朗所有出勤的警務人員名單post出嚟。

永遠撐警的藍思明

後續

後來警方高層覆咗我,佢哋話:

「你當晚咁樣係濫用999,我哋保留charge你嘅權利。」
「我哋將個畫面拉闊啲,係由一班人,帶一班示威者,促成這件事……你就是嗰班人之一。」