荔枝角饒宗頤文化館的旅館「翠雅山房」,將用作針對新型冠狀病毒肺炎疫情的檢疫中心,附近居民群起反對。袁國勇今早指,翠雅山房距離民居很遠,不用擔心,那裏已經位於山上都不滿,是對科學完全不了解、不認識,甚至沒有普通常識的想法。
有些人更認為,我們已經欠缺了理性討論的空間。好吧,我們理性討論一下:
1. 過去大半年,香港政府有沒有理性討論過?幾乎是各行各界反對的送中條例,引發過百萬人上街,政府有沒有理性討論過,接受過民意?
2. 冇,係完全冇,仲要將一切反對意見視為敵對勢力,不斷打壓,教育界、醫護界、新聞界等各個專業都被秋後算賬和打壓。
3. 政府在處理反送中一役,有咩係妥協過?佢哋嘅做法係咪對政治、管治完全不了解、不認識,甚至沒有普通常識的想法?係人知係,咁點解依家要居民妥協?
4. 過去大半年,香港警察如何對待交稅出糧畀佢哋嘅市民?抗爭遍地開花,各區爆發抗爭,香港警察濫用權力進入私人地方,美其名係執法,事實係濫權濫暴濫捕。佢哋叫廣大市民做乜嘢?叫曱甴,係曱甴。翠雅山房附近的居民,包括美孚三區及盈輝台那邊,在區議會選舉投票選出的,全部是所謂「暴民黨」的公民黨議員,換言之附近居民都係高官眼中的「暴徒」、警察眼中的「曱甴」,把暴徒曱甴附近的翠雅山房當作隔離中心,其實係非常非常之危險啊,點解你哋唔驚嘅?點解平時就叫人做曱甴,依家就叫人「同心協力抗疫」?你點可能叫曱甴同心協力㗎?
5. 附近居民有所憂慮,出來抗議,根本無可厚非,但警察又點對呢啲居民?就喺昨晚,搵防暴嚟掃場,噴椒,濫捕,連區議員都拘捕埋。然後你話居民冇常識,應該妥協合作?
6. 如果你覺得三萬警察真係撐起香港,全港市民都是暴徒曱甴,呢個時候,點解唔搵警隊出力?新屋嶺呢啲人跡罕至嘅地方,有常識都知好過翠雅山房多多倍,還有黃竹坑警察學院,都好多營地,還有警察遊樂會、警察宿舍等N咁多個警察設施,你政府不如去求佢哋,做乜嚟搵你最憎嘅暴徒曱甴?
7. 再講,就呢次抗疫,特區政府完全係垃圾級應變,唔封關,冇口罩,日日講埋啲刺激大眾情緒嘅廢話,然後你叫廣大市民要包容要有常識要合作?醫護已經夠慘,佢哋罷工自救,畀你啲親政府五毛組織不斷抹黑,你哋政府有咩具體行動係支持過醫護?最叻道德勒索囉。最前線、需要好多資源才培養出嚟嘅醫護,你政府尚且咁樣對佢哋,然後你叫廣大市民合作?
8. 簡單一句,一個毫無誠信、沒有認受性、無能、視民眾如仇冦嘅政府,你有咩資格叫市民合作,畀你喺民居附近設置隔離中心?

