立即捐款

最佳編劇唔係香港警察咩?

最佳編劇唔係香港警察咩?

香港金像獎塵埃落定。老實講,上年成年都冇乜睇戲,六月之後連戲都冇得拍。除咗冇心情外,最重要係,六月開始香港上演嘅連場好戲,已經荒誕離奇過電影橋段,入場睇戲仲可以畀到咩驚喜我?

好似721、831咁,邊有人會諗到條咁嘅橋?諗到又邊有人會投資?試諗吓你向老闆sell條咁嘅橋:

「嗱,呢套勁呀,咩警察做無間道已經爛晒,我呢套戲係講警察直頭變咗黑社會咁。你有冇睇過《竊聽風雲3》?元朗鄉黑背景,不過唔係套丁起樓,直頭衝出圍村,浩浩蕩蕩一千幾百人着晒白衣出去西鐵站見人就打,打到頭破血流,仲要早三日預告……」

「吓?咁啲差佬死㗎?」

「呢個就係大橋所在,佢哋一早同警察夾定,打完先會出現。到時二萬幾個九九九,一個警察都冇,差館落閘關門,但係全港直播睇實,呢條橋係咪好大膽?未夠喎,咁梗係有啲正義市民出嚟質疑同反抗,要向警方尋回公道,但結局最後一幕,警察都變咗白衣人咁,首尾呼應,衝返落地鐵站見人就打,打到頭破血流,再封埋成個站,冇人知道發生咩事,套戲咁就完,係咪好勁先?好似《無間道》咁,忠嘅死晒,奸嘅贏晒,然後再拍三部曲……」

上年六月之前,任何電影老闆聽到有人Sell呢條橋,我敢講100%嘅反應係:「痴L線,浪費我十五分鐘時間!」其實我諗就算有編劇諗到類似嘅情節,諗諗吓都會罵自己:「痴L線,咁嘅劇情邊有觀眾會信?」

咁嘅劇情就係發生咗喺現實囉。

所以,我覺得金像獎係欠香港警察三個獎:

(1) 最佳電影:《721831》,全球無人能想到和拍得出的劇力,香港警方完美演繹;
(2) 最佳編劇:鄧炳強及一眾「四點警謊記者會」台前幕後人員,可以不斷編故事掩飾自己嘅惡行,將黑講成白,將白抹成黑,將鐳射筆講成鐳射槍仲可以點火,將《721831》講到(佢哋自己覺得)合情合理合法而面不改容;
(3) 最佳武術指導:一眾防暴、速龍嘅亂棍動作和拳打腳踢,拳拳到肉,至死方休,電影邊睇得到?

當然,《721831》呢套經典,還應得到一個獎——但唔係頒畀警方嘅——就係唱到街知巷聞嘅電影主題歌曲《願榮光歸香港》,點都應該攞返個最佳原創電影歌曲。

現實比電影荒謬,仲係荒謬百倍,信了!