香港再出發廢佬大聯盟總召集人、曾收取五千萬並不尋求連任的前特首梁振英講過,大聯盟嘅首要宗旨,係要拒絕攬炒。
聽到覺得好奇怪。
乜嘢係「攬炒」?人哋攻擊你,自己處於極劣勢,眼看冇法迴轉,就不如攬住一齊死,同你同歸於盡,呢個叫做「攬炒」。如果以獨孤九劍而論,就是「攻敵之必救」,你唔救就攬炒,齊齊中招。
我認為大家一直好努力去做嘅終極攬炒,係美國以香港民主人權法案制裁香港官員、警察、權貴等,並重訂香港關係法及撤銷香港獨立關稅區,然後國際社會包括歐盟跟隨,外資撤出,此乃真正終極攬炒。
而出到攬炒呢招,首要條件就係我哋畀人打到就快死。咁邊個開波打我哋?當日由香港再出發廢佬大聯盟嘅長老董建華揭開序幕,意圖削弱香港種種核心價值,並一直主導中港融合,導致五十萬人上街。經過曾蔭權以及北京奧運的休養,論到大聯盟大將梁振英出手,引發雨傘運動。但梁振英未竟全功,黯然退下,再由林鄭月娥以反送中揭開香港終極沉淪,所有一直掩蓋的問題立時如喪屍出籠,誓要將香港核心價值包括新聞自由和司法獨立摧毀,要香港徹底變成大陸。
這就是攬炒意識出現之因。
既然你要香港人不好過,一眾權貴卻想置身事外,繼續享受,那不如順你們的意,將香港變成大陸,然後引發以上所提及的終極攬炒目標。你可以說那是攻敵之必救,但共產黨是從不講理性只講野蠻權力慾,你問佢將香港消滅有咩好處?佢答唔出,但總之看不順眼,就應摧毀!所以香港人有玉石俱焚的準備,你要把我害得這麼慘,我也不讓你好過。
好了,那麼如果大聯盟希望拒絕攬炒,那意味着,美國不要修訂香港關係法,不要取消獨立關稅區地位,咁,咪即係乞求美國?咪即係向外國勢力低頭?如果不是這個意思,即可以任由美國制裁,咁正符合大家對終極攬炒的願望,又何來拒絕攬炒?
有時真係忍唔住笑!

