立即捐款

「冇人叫你喺的士親熱,你做得就預咗」——真係好難聽

「冇人叫你喺的士親熱,你做得就預咗」——真係好難聽

今日網絡最爆的,是史稱「狂摸(自摸三番個摸)的」事件。這件事爆發爭論,有人認為司機缺德,揭發私隱問題,有人認為冇人叫你喺的士親熱,你做得就預咗。

我覺得喺國安法加上一眾通訊軟件拒交資料畀港府的背景下,大家嘅討論可以唔係八卦、獵奇或葡萄嘅心態,不如改用另一個角度去諗諗呢件事。

的士作為私人服務,開了CAM錄低啲嘢,除咗攞嚟呈堂去為刑事案件作證外,其實點講都係唔應該公開。大家覺得「搞嘢狗男女」一定係好唔啱(而呢一種反應又好Chinese),所以就覺得司機係「替天行道」。但睇返,佢哋嘅親密行為究竟有冇犯法呢?就咁睇又唔覺。咁如果司機好唔鍾意,而佢係一個私人服務者,其實可以停車趕佢哋落車,段片嘅作用就可用嚟證明「我唔係拒載,係我道德唔容許或佢搞到我專心唔到揸車」,但依家司機錢又照袋,片又照放,咁呢種行為令我推斷佢係一種好特別嘅藍色,名曰「自私藍」。

呢個都唔係最重要問題,最重要係,如果大家因為可以高高在上批鬥「狗男女」而覺得司機做得好啱嘅,咁不如諗吓,如果坐喺車後面嘅係一對年輕男女,佢哋喺度討論同其他同學仔搞學校「人鏈」,一齊舉「光時」牌,唱榮光,仲話有個阿sir叫佢哋唔好但唔會禁止,呢個藍絲司機將成段對話放出嚟,然後引來全天候嘅文革式批鬥起底,咁你仲會唔會覺得呢個司機做得好啱呢?

「冇人叫你喺的士親熱,你做得就預咗」,其實今時今日聽到真係好難聽,因為呢句嘢係政府就住國安法嘅line to take。我奉勸各位同路人,睇還睇,八卦還八卦,但唔好突然變咗你最憎恨嘅人嘅口脗。如果乜都話預咗,各通訊軟件都唔使暫緩畀資料港府,佢都可以一句話「冇人叫你喺上面講時代革命架」,你點駁好呢?

題為編輯所擬