[草根.行動.媒體]
文： 勞非奴
日前收到朋友問：
我有個做地盤的朋友，之前工作時受傷插穿左隻腳，好在冇傷到筋骨，不過依家都休息緊。
佢一開始問老細會唔會報工傷，老細話費事報啦，假期錢醫療費畀足就算啦，咁做工傷個朋友初初都覺得冇乜所謂老細話點就點囉。跟住再過左一段時間，佢老細又話：「算啦，都係報番工傷啦」
咁我都有個疑問：其實點解個老細當初會唔想報工傷？同埋係咪只要老細畀足假期錢、醫療費，就算唔報工傷對個工人都冇乜損失？
勞非奴：
因為地盤的工業安全紀錄越靚，工傷數字越少，對承建商之後投標政府工程會有幫助，同埋有過工傷紀錄，之後買勞工保險嘅費用都會增加，所以有啲老細會想同工人「私底下解決」，直接賠錢畀工人就算，而唔幫工人報工傷。
係咪只要老細畀足假期錢、醫療費，就算唔報工傷對個工人就冇損失？梗係唔係啦！
首先，作為工人要知，法例上對工傷的保障唔只假期錢、醫療費，仲有判傷錢同疏忽賠償：
一）工傷病假錢—即係工傷病假期間工人可以有五分之四人工
二）醫療費—除左每日上限 $370實報實銷嘅門診或住院費用外，仲包括長期照顧費、義肢費用同埋義肢維修費。
三）判傷錢—全名「永久喪失賺取收入能力補償」，當工友傷勢穩定，勞工處會安排「判傷」評估工傷或職業病對僱員工作方面造成的永久影響。工友可得的補償金額視乎年齡、每月收入及傷勢而定，比較年輕的工友，如40歲以下的工友會得到較高補償金額。
四）疏忽賠償—如工傷的過程中牽涉到第三者(包括僱主、工具生產商等)的錯誤和疏忽導致，如工具設備不足或失修等，有機會可民事追討疏忽賠償。
如果萬一工傷工友答應老細「私底下解決」，甚至簽署左「不再追究協議書」之類，萬一傷勢有什麼變化或手尾，就很可能會追不回上述各項的權益補障喇。
另一樣工友可能很擔心的，是老細唔想報工傷又堅持要報，老細會否一怒之下解僱工友？
如果工友因工傷受傷而被解僱（在未有達成工傷協議或補償評估証明書未發出之前）或在有薪病假期間被解僱，都屬於不合法解僱，勞資審裁處如認為復職是恰當及切實可行，可以無須先取得僱主的同意，就作出復職命令。
若僱主拒絕執行復職令，則須向僱員支付終止僱傭金(按比例計算的長期服務金)；不超過15萬元的額外補償金；以及僱員月薪三倍的額外款項，上限為7.25萬元。
咁都應有一定阻嚇性令老細唔會一怒之下就解僱工傷工友。
當然如果整個工傷階段完結後，工友會否被老細解僱，如上一篇的最尾部份所言，現時的法例都基本上是毫無保障啦.....
延伸閱讀：
僱員補償條例簡介｜勞工處
勞非奴語：
作為勞工團體前員工，接觸過大量勞法個案／查詢，經常覺得勞法知識應該列入中學必修課。
至少確保畢業後的打工仔女不會被老闆呃，連老闆犯左法都唔知地逆來順受。
大家有何勞法疑難，歡迎FB PM或留言查詢 （請註明：勞法查詢）。
[草根.行動.媒體]
網頁：https://grassmediaction.wordpress.com
臉書：https://www.facebook.com/grassmediaction
telegram channel： https://t.me/actionofgrassmedia