今次講嘅新聞，表面上係財經新聞，但係食落粒花生又有啲juicy，兼且涉及香港有無按照《基本法》第6條規定，保障私有財產權嘅問題，所以都算得上係時事新聞。成件事嘅開始，可以由股壇長毛David Webb喺2017年公佈嘅「50隻不能買股份」名單講起。話說名單公佈後，觸發多隻細價股股價暴跌，當中唔少都係來自人稱「粉哥」嘅葉志輝打骰，所以呢次股災又俗稱「粉爆」。
「粉爆」之後，佳兆業太子爺郭曉群開始趁低吸納，買入康宏環球嘅股份，並且喺擁有29.91%股權嘅情況下，成為咗集團大股東，然後諗住正式要求康宏召開股東會，罷免8名董事之後嘅一刻，神奇嘅事就開始出現：首先係康宏入稟法院，懷疑郭曉群買入嘅康宏股份涉及循環貸款，質疑佢所持有股票嘅合法地位，然後康宏主席陳志宏就喺特別股東大會上，以郭曉群手上嘅股份正係被康宏告緊為由，剝奪咗對方嘅投票權。
去到2018年，郭曉群向康宏發律師信提出質疑，廣宏嘅回覆就以郭曉群持有嘅投票權「至少2.5%有問題」為由，否決對方全部嘅投票權，亦唔承認郭曉群喺康宏有任何經濟權益。去到今年，由於康宏三年內都無公佈業績，面臨除牌危機，於是郭曉群再次要求康宏召開特別股東大會，打算將包括馬時亨同石禮謙加入董事局，只不過康宏管理層一樣當冇件事。
成件事有趣嘅地方係：一，康宏懷疑對方至少2.5%投票權有問題，咁個實數係幾多呢？二，你懷疑對方2.5%投票權有問題，又憑乜剝奪對方100%嘅投票權，仲要連派息同決定公司清盤嘅權益都無埋呢？三，康宏剝奪完郭曉群嘅投票權後，三年內都唔公佈業績，究竟又想隱瞞啲乜呢？
更重要嘅係，郭曉群嘅股票係喺聯交所嘅交易平台買嘅，佢所持有嘅29.91%股權，依然可以喺交易所嘅「披露易」中睇到資料，公眾亦可以隨時查閱。換句話講，根據無罪推定原則，郭曉群喺康宏嘅股權，喺法院未有判決前，至少仍然被視為合法持有，康宏嘅公司主席，又憑乜嘢剝奪對方嘅股東投票權同其他經濟利益？
根據《基本法》第6條：香港特區依法保護私有財產權，股東投票權本身就係私有財產權嘅一部分，只有法庭禁制令或政府嘅行政命令，至可以暫時凍結對方嘅私有財產權益，至於永久剝奪對方嘅財產權，則只有法庭嘅判決至可以做到。康宏主席又唔係法官，佢憑啲乜嘢可以篡奪法香港司法機關嘅權力，自行剝奪另一個股東嘅投票權呢？
呢件事驟眼睇落去，對於平日只會買入小量股票嘅升斗市民來講，好似唔係好關自己事，其實唔係。金融同股票市場喺香港重大嘅支柱產業，市值比香港GDP大十三倍，對香港GDP貢獻達20%，兼且養住幾十萬勞動人口。假如一個人真金白銀喺香港股票市場買入股票，喺無任何法律基礎之下，就可以無啦啦就行使唔到股權的話，對香港嘅股市聲譽同影響，又會帶來幾大嘅衝擊呢？呢個問題，就要交由偉大嘅特區政府自己處理了~