2013年5月6日，係《足球說故事》喺Facebook 嘅創Page日子，一寫就寫咗就嚟8年，由一個本來只係得我自己一個人lik 嘅page，到今日有過4萬人like嘅page，都算係我人生一個小小嘅成就。
呢8年可以話將我嘅個人價值同心血全部投放喺度。讀書打文、返工打文、出街打文、食飯打文、搭車打文、我無時無時刻都會有靈感到，平嘅我係有啲專注力失調，好易坐唔定，但偏偏寫嘢嘅時候我係最靜、最專注。
呢8年開心自己有少少影響力，但喺經營Social media嘅同時，我都經歷好多迷失同挫敗。試過同其他Page鬧交、試過寫錯嘢畀粉絲問候、試過畀人無故狙擊針對、試過畀人話寫嘢好撚煽情而被批評，試過為咗貪快而冇Factcheck、試過畀人話寫得好差、試過因為唔夠其他Page多like而唔開心等等......
基本上開得page會面對過嘅問題我都遇過，有段日子我直情諗過要close page，一嚟覺得要玩social media嘅遊戲實在太攰，二嚟我覺得嗰時為咗保持人氣、維持facebook嘅Engagement、曝光率、like數，做咗好多只為呃like嘅Daily news而非一直以嚟嘅初衷─說故事，我覺得唔知自己做緊咩。
後來朋友s嘅挽留，加上自己心態改變，我開始看淡social media上面嘅數字遊戲，反而輕鬆咗好多，我又搵返我開呢個page嘅初衷，但係我都要承認，呢一兩年我嘅投入真係少咗，尤其社運之後。有懶嘅時候、有忙嘅時候、有無心情嘅時候、有傷心嘅時候。
總之我就由無時無刻update變成幾日一帖、再到一星期一帖、再到一個月一帖，好多其他體育page會講嘅熱話、球賽、花生等等話題我都冇follow。但你問我係唔係放棄《足球說故事》，我可以肯定講唔係，因為我對寫作依然充滿熱誠，只係我將寫嘢嘅力量轉移去足球以外嘅事之上，所以大家見我少咗update，因為寫嘢真係需要時間同精神。
喺大家未吹雞轉去MeWe之前，其實都有人問我會唔會開Patreon。
「點解唔試下用嚟搵錢？賺下稿費都好。」
每次聽到咁講，我都例牌講一句：「開呢個page 我純粹係興趣，我冇諗過要嚟搵錢。」
唔好誤會，我職業唔係兒子，我份糧基本上係〝un〞（工種問題，全行都係咁），而且我覺得文字係好有價值，只係我由開page第一日已經知道，我唔係要用呢個page嚟搵錢，我唔想比自己太多壓力，要記住呢個只係興趣，所有文字以外嘅嘢都係bonus；我亦唔想因為多咗個付費訂閱而令自己嘅作品少咗曝光，我想你睇我寫嘅嘢，多過你畀錢support我，因為有冇稿費都好，我都係會keep住寫，唔係點寫8年啊？（自己生活上都好少付費訂閱頻道）
幾年前一直諗，如果我冇咗faecbook呢個平台，我到底會點？一個del掣就可以同呢8年嘅價值講bye bye，而我亦都知道我冇可能一直都依靠住／寄居於facebook，總會有改朝換代嘅一日，但當我真正知道《足球說故事》嘅價值喺邊度，我就唔會介意之後嘅「我」會出現喺facebook定其他平台，因為只要「我」一日仲喺世上，《足球說故事》就會一直都在。
多謝一直以嚟支持《足球說故事》嘅朋友，其實咁大篇文想講嘅一個重點係：今日之後將會喺MeWe同步更新。