官方文件解讀房屋的供應數字好多，有長遠房屋策略的十年供應目標、未來三四年私樓單位潛在建屋量（超過九萬）、公營房屋五年建屋量（十萬），互相之間難以比較。加上每屆政府都強調自己「大力搵地建屋」，單單從官員的講法，普通市民唔容易知道房屋供應的真實狀況係點？
將散落唔同地方的建屋量數字整體出來，比較對上兩屆政府的公私營房屋的「建屋量」，會發現到幾個殘酷的現實。兩屆政府每年平均的單位建屋量都少過三萬間，遠遠少過長策目標的四萬六千間（去年更新﹕四萬三千間）。
林鄭任內私樓單位平均建屋量得約1萬間，整體公私營房屋合計的每年「建屋量」的數字都少於上屆（上屆27萬8千、今屆25萬8千），其實兩屆政府都無意欲增加房屋供應，如果唔察覺到依個現實狀況，只係單方面接收每年施政報告吹噓嘅「供應數字」，好易比政府呃落去。
雖然近年的房屋供應嘅成份有唔少水份，由「限呎地盤皮」開始，愈來愈多納米單人公屋居屋、私樓蚊型單位、納米樓等等。一間屋由動工到起好要四至五年浮動嘅時間，今日嘅單位供應係四五年前政策的結果，因此監察「建屋量」，比起睇即時的落成量，甚至政府口中的潛在供應數更加準確。
相比起長遠房屋策略所訂立的單位供應目標長期滯後，政府明顯更加重視（財政預算案裡面）納入基本工程儲備基金收入的「地價收入」。今年的「地價收入」下跌（870億），政府快快手將啟德商業地皮改為住宅拍賣，增加來年的「地價收入」（976億）。政府大力搵地係重視「地價收入」，抑或是實質的房屋供應呢？