呢句話係林鄭自己講嘅,唔講我以為係王祖藍扮佢講嘅。
但咁關顧人命嘅話,點解用打針嚟要脅全港市民呀?大佬,好多有長期病患嘅人,見到咁多同類病患嘅人打針死咗,梗係睇定啲啦。好啦,依家話你冇打針唔准去堂食,即係剝奪呢啲人食飯嘅權利。以糖尿病為例,香港大約有兩成患者,即係過百萬人如果諗住出去食飯,就要冒死打支針先。
林鄭又好自豪咁話,安心出行有三百五十萬人下載。真係好好笑!當初呢個程式根本冇乜人下載,好明顯連藍絲都唔聽你支笛,咁花咗咁多錢整個APP出嚟,條數咁差,交代唔到,唯有立例強迫入食肆要裝APP或填紙仔,然後個下載數字先突然大升,係夾硬捽靚條數。即係好多人拒絕食屎,你就立條例話唔食屎唔可以出去食飯,咁有咩好自high呢?
依家到科興冇人打,又交唔到數。最慘連啲藍絲都唔去打。我圈子裏面嘅藍絲,身體好誠實,全部走去打伏必泰,仲要話好想打科興但N個理由唔去打。你真係唔好當全香港人傻架啦,連中國疾控中心近日都走出嚟話,中國疫苗保護力不高,當局正考慮透過混針、改善接種方法等,提升疫苗有效率。我唔反疫苗,但連國家都認有問題,你叫我點打呀?過百萬長期病患者點打呀?三十歲以下嗰啲未打針又點計呀?
好啦,又為咗要交靚條數,於是以復業和出街食飯要脅全港市民,要人打晒兩針。大家都知伏必泰數量唔多,科興日日有剩,咁要復業同出街食飯,最快排到咪去打科興囉,咁咪有數交囉。
最好笑係,盤古初開叫你封關,而第三波也承認豁免太多而爆發,依家竟然放寬全中國嘅人隨便落香港,唔使打咗針架喎。即係點呀?佢哋落到嚟有冇得出去食飯?應該冇架喎,但可能有得豁免架,點解?你話啦,政府有冇當你香港人係人?係呀,冇架,咁你哋衰嘛,唔聽政府話嘛,抵你哋死囉。
(本網歡迎各界投稿,文章內容為作者個人意見,並不代表本網立場。)

