立即捐款

社運

學聯回應反佔領市民的辱罵(20141124灣仔站)

學聯回應反佔領市民的辱罵(20141124灣仔站)
廣告

廣告

學聯回應反佔領市民的辱罵(20141124灣仔站)transcript(8分鐘映像)

Transcriber按:[1]打這transcript的目的,一、嘗試以文字展現街站的情況,尤其在佔領區沒data看片的朋友可以從文字了解情況。二、想到街站幫手的朋友,可以從反對人士的說話進一步了解或思考,為何他們會反對佔領?他們對民生其實有甚麼需求?三、見到有朋友說,想跟其他人解釋這場爭取民主政制運動到底是怎麼回事,但很難說得明白,政治冷感的人又不想明白。這個transcript可以作為說辭的其中一個參考。集思廣益再加上自己的分析及體會,以及有想推廣民主精神的心,必能思考出能促進溝通的說辭。四、為同學們及義工們的辛勞留下文字記錄。[2]鏡頭外市民的指罵,有一些無法判斷是在罵同學還是在罵罵他們的人。所以除標明外,不加註解,看官請自行判斷。[3]港鐵沒有每個月加價,相信是口誤。看見有人會執著一兩個字眼去攻擊別人,特此呼籲大家理性討論,了解整個發言而不是只執著一兩個字眼做文章。

石同學:我哋希望各位市民…….(一阿叔在左邊non-stop大喊,聽到「還我馬路!」)我哋尊重多元嘅聲音,呢個正正係一個真正嘅民主社會所發生嘅事。因為我哋係容許唔同嘅市民發聲,我哋希望各位同學各位市民唔需要去到(岑同學叫石同學pass咪給他)

岑同學:謝謝,謝謝,謝謝你嘅意見。(片cut)淨係得習近平可以話事。(阿叔仍在左邊non-stop叫罵,聽到"清醒吓啦!")所以,係,明白(另一阿叔在右邊出現)多謝,多謝。(第三個阿叔在右前方罵)多謝。多謝。係。(片cut)聽到你嘅意見。聽到你嘅意見。聽到你嘅意見。好。謝謝。(右前方第三個阿叔仍在指罵)所以,點解,我哋每一日落街都會俾人問候阿媽,甚至乎每一日都有幾百個電話打嚟問候我屋企人,我哋都要堅持,我哋都要繼續……(片cut)(左邊阿叔一直在罵,數位義工和他談天,讓岑同學可以繼續嗌咪)個原因就係,在於,我哋唔希望香港,變成咁樣樣。我哋唔希望香港,繼續俾少數嘅人把持住,繼續俾少數嘅人壟斷,繼續將所有嘅利益,繼續將大家嘅民生,大家嘅生活,傾斜喺地產霸權,傾斜喺大商家,傾斜喺共產黨嗰度。所以點解我哋咁辛苦,點解大家要鬧,我哋都要企出嚟,都要希望,都要希望同大家解釋,個原因就係在於,香港人,絕對係應該享有最基本嘅政治權利,(左邊阿叔趨前,在岑同學耳邊大喊)絕對係應該享有一啲好基本嘅訴求,包括就係,一個民主嘅政制,包括係喺唔同嘅層面上面,我哋可以當家作主。我哋可以,自己(嘅生活)包括係全民退休保障。(片cut)

(石同學嗌咪。左邊non-stop阿叔趨前,不同咪,在石同學耳邊大聲指罵。阿叔旁有一女士趨前指罵。另右邊有一男士回罵阿叔同女士,「你講就得,人哋講就唔得!你咪自己開個壇嚟講囉!」)

石同學:我哋會俾伯伯發聲嘅。(阿叔繼續在石同學耳邊大喊)(片cut)(右邊有一女士大喊:「俾佢講!講到佢唔講!」)我哋係聽到大家嘅聲音嘅。我哋聽到大家嘅聲音。(片cut)(支持同)反對我哋嘅朋友,我哋都好多謝大家願意將你哋嘅意見話俾我哋聽。(右邊有一大叔拿機拍攝石同學)我哋今日落區,我哋今日去到社區宣傳(左邊女士趨前指罵)就係想聽大家嘅(意見)(片cut)想知道大家嘅諗法,點樣睇佔領,呢一樣正正係點解我哋要走出佔領區同市民溝通。我哋呢一班學生,呢一班市民(片cut)我哋唔係自己喺度圍威喂,我哋都希望了解大家嘅想法。我哋亦都歡迎大家落到嚟佔領區,同我哋一齊溝通。我哋喺佔領區願意聆聽大家嘅聲音,知道大家嘅想法。因為呢個正正係民主嘅精神。我哋爭取緊民主,我哋亦都會係會了解大家嘅想法,我哋尊重多元嘅聲音。(片cut)

岑同學:天氣涼啦,係要小心身體。(左邊後面一女士高聲叫罵)唔好病。呢位阿哥你著短裇衫短褲,小心啲。(警察送走身後那女士)所以如果各位圍觀嘅朋友如果有興趣,都可以喺度攞啲單張,喺唔同角落,同唔同嘅市民去派呢啲單張(鏡頭外有一阿叔non-stop罵。右邊後面有一阿叔罵義工。剛走被送走的女士折回大罵,聽到「唔死都冇用呀!」)去話俾香港嘅市民聽,話俾灣仔街坊聽,(那女士接近大罵)去話俾灣仔嘅朋友聽,點解我哋咁辛苦,俾你鬧都要喺呢度(片cut)俾你鬧都要喺度(那女士罵:「你班人冇嘢做架!...乞兒呀!你老豆老母……錢俾呀!你哋冇……呀!」)俾人鬧絕對唔係好事,俾人鬧絕對唔會開心,我哋每一日都俾人鬧,我哋遲啲可能會坐監,其實一定會坐監,但係(片cut)我哋都會堅持(女士non-stop叫罵)每一日都要,喺呢一度,做自己覺得應該要做嘅嘢。好簡單,問大家幾個問題……(片cut)

(女士指罵:「……未做過嘢!食咗老豆老母錢!吓!你哋有咩做過呀!一日……老豆老母錢!)(另一男士高聲:「打倒佔中,還我馬路!」)(片cut)

岑同學:我哋唔好同佢哋對罵。(鏡頭外一男士:「影哂相呀!收得錢就……喺度嘈呀!」)唔一定個個都收錢嘅(重覆三次)(片cut)唔係個個都收錢嘅(重覆兩次)(女士:「知你...嚟就走嚟鬧你呀!」)唔係個個都收錢嘅,我絕對歡迎俾你鬧,我每一日都俾人鬧,係呀。(女士:「梗係啦!你老豆老母……」)(片cut)(女士:「(怕乜嘢)俾人鬧呀!吓!」(激動,略喘氣))

岑同學:點解港鐵每一個月都加咁多價(激動女士:「我而家唔鬧得你牙!……阻住條街呀!」)(一女士:「走啦走啦!」)而港鐵嘅大股東係政府,但我哋冇得話事嘅?點解屋企全部變哂領匯,全部變哂味千,全部變哂元氣,冇哂啲魚旦舖,冇哂啲小商店,冇哂啲茶餐廳呢?個原因係在於啲乜嘢呢?點解旺角,以往好多嘅魚旦粉,或者係腸粉舖,小食舖,或者係一啲飾物嘅小商店,全部執哂笠,變哂金舖,奶粉舖,藥房呢?(鏡頭外不停有人罵,聽到「阻街」)呢一個嘅原因係在於啲乜嘢呢?究竟係咪我哋呢一班,好似你哋咁樣講,未出嚟做過嘢嘅靚仔做成呢?究竟,香港咁多嘅民生問題,呢位伯伯都可能冇全民退休保障,可能佢,如果係搵唔到呢份工,佢都可能會好艱難,過得好艱難,自己一個人住,甚至佢話,寧願自己撼頭埋牆,死咗去。(鏡頭外持續罵)當然,雖然,雖然,我哋同佢政見唔同,但我哋絕對唔希望一個老人家,因為政府唔養佢,而佢自己撼頭埋牆死咗去。(鏡頭外一男士:"死咗去咪好囉!"數群眾鼓掌,包括那位阿叔)所以,呢一個政府嘅政策,包括係所有嘅民生議題,全部唔係傾斜喺我哋,全部係,有機會令到呢位伯伯撼頭埋牆,令到呢位伯伯,係淨係有機會有得食元氣,有得食味千,而冇得食粥,冇得食魚旦粉,冇得食一啲可能佢食咗好多年嘅嘢。個原因就係在於,呢一個政府,並唔係由我哋選出嚟……(唔)佔領馬路?(笑)我都想呀(群眾笑)如果唔佔據馬路,港鐵唔加價,如果唔佔據馬路,領匯全部執笠,如果唔佔據馬路,啲金舖全部變哂魚旦粉,我梗係走啦阿哥(笑)。(群眾鼓掌)(片cut)個原因就係在於,根本就係一個不民主嘅政制。呢一個政府,完全,係唔會理我嘅需求。而人大八月三十一號落嘅三閘,人大八月三十一號嘅決議,就係繼續,將呢個問題,千秋萬世咁樣延續落去。(片cut)

石同學:……今日我哋落區其實唔係為咗要引起一啲騷亂,唔係要引起今日呢一場嘅對罵。對於頭先...即係直到依家嘅騷亂,我哋對唔住。我哋今日落區,其實係為咗走出佔領區,同大家對話,了解吓大家嘅想法(群眾鼓掌)就好似頭先咁樣,即使係……(群眾鼓掌)多謝大家多謝大家。即使係,可能有啲伯伯,有啲市民同我哋講,佢哋反對佔領,我哋願意聽,我哋願意同佢哋對話,了解吓到底點解大家,有一啲人,佢哋咁反對佔領。呢啲聲音我哋係會收到。我哋係會將呢啲聲音帶番去我哋嘅會議度,一齊討論,原來而家嘅民意係咁樣樣,我哋應該點處理。各位市民,我哋係歡迎大家俾啲意見,我哋亦都歡迎(將)一啲反對嘅聲音帶過嚟俾我哋,因為我哋就係實踐緊民主。我哋喺佔領區裡面,即使一啲藍絲帶,一啲反佔領嘅市民,我哋都歡迎,都彼此,一齊係去到傾,俾佢哋發表佢哋嘅意見。因為呢樣嘢先係最重要,呢樣先係尊重多元嘅聲音,呢樣先係真正嘅民主。

後記:綜合昨天各街站repo,我相信,這個街站已算和平。很佩服同學們及義工們的EQ。被這樣子罵,我想我會很害怕,會逃走。我不是同學們及義工們肚裡面條蟲,我個人感覺他們有點無奈(尤其是岑同學說到「俾人鬧絕對唔係好事」,看著我都要哭了),即使如此,兩位嗌咪的同學都有很高的EQ,仍然能笑著嗌咪,並且他們仍會感謝反對人士的意見,這是尊重人生而為人享有的基本自由。義工們也沒有被嚇退,會互相保護,會嘗試隔開反對人士,讓街站可以繼續運作。及後有群眾幫忙,我眼淺,想哭。向市民講解民主精神,是很有意義但艱巨的任務。謝謝同學們及義工們的辛勞。

映像:考慮到版權問題,請自行在youtube搜索transcript的名字收看。上傳者:Peterlee123

廣告