立即捐款

左丁山: 假環保之名

廣告

廣告

相信左丁山代表了好一部份人的心態,就是既然付了錢,為什麼不可以換來應有的服務?可是,很多人都不知道,服務帶來的代價,是要地球環境來承擔,要人類後代承擔,那麼你還要繼續這種心態嗎?

(來源: 蘋果日報 2005-06-11 GG細語)

左丁山住過好幾間海外五星級酒店,碰到同一樣要求,就係在浴室內有一張印刷精美字條,意思係:「因環保理由,請你珍惜用水,浴巾毛巾未必須要每日更換。如須更換,請把毛巾放在浴缸內。」第一次見到,為尊重「環保理由」,冇換毛巾兩日,第三日就頂唔順用濕毛巾抹身,幾大都要換過晒乾。之後見得多,諗諗,酒店收我咁多錢,百幾二百美元一日,英國、美國酒店閒閒每日收三百美元,我只係每日在房間內睡覺八小時,換條毛巾都有罪惡感?於是睬佢都,日日要換新毛巾。

呢日睇《南華早報》Lai See專欄,講到北京十三間四星酒店包括建國(Jianguo)、西園(Xiyuan)聯手搞一個「綠色行動宣言」,宣布逐漸取消提供酒店房間內浴室用品如牙刷、牙膏、拖鞋、洗頭水、沖涼液、梳等等,跟住就會停止每日更換毛巾、床單。大家到北京住呢四星酒店,記得自備上述用品,至於毛巾、床單,就忍一忍身體氣味啦。

家乜都講綠色、講環保,左丁山懷疑酒店以此為包裝,想慳錢,節省經營費用就真。左丁山以前做過幾十間酒店投資分析,每個月睇住幾間五星、四星酒店損益表,知道洗頭水、牙刷呢類用品,佔酒店總經營成本,只係一個好少比例。呢類大路貨來價十分便宜,供應商其實冇乜賺頭,但係因為包裝得好靚,人客重會誤會係高級用品。

睇怕下一步就係要求酒店住客少用空調、少用電,一切假環保之名行之。上次左丁山到曼谷,五星酒店房間內燈光昏暗,睇報紙與寫稿都有困難,於是要求換房,酒店話咁至夠羅曼蒂克氣氛與輕鬆云云。大家拗一輪,卒之要補錢upgrade去一間光猛大房,實在係俾酒店搵笨。

廣告