上周四葉蔭聰跟我說，有隊露宿者足球隊練波，問我有無興趣去採訪。我反問佢：「露者者踢波，有咩好睇呀？﹗」講多陣先知道這班露宿者組軍目的是要參加世界杯，聽落幾有趣。即時身癢兼腳癢，想去採訪順便落場搓番兩腳。
去之前我想起中學時在街場跟隊，有隊露宿者總會叫埋一份，但即使叫得聲嘶力竭，踢波這個遊戲都無佢地份。在球場上，他們被小流氓欺負多過踢波。
香港人對露宿者有很多假設性的想像：一直以來，主流媒體總會將他們呈現成自我放棄的一群。他們露宿的原因，或者因為生意失敗、或者因為私生活不檢點，可能以往沉迷賭博女色、吸毒酗酒、現在甚至有精神病。因為他們不善生產，才會被政府、被市民遺棄-。
露宿者是隱蔽的一群，他們是社會問題。
咁露宿者又點解有世界杯？香港無啦啦點會走隊露宿者代表隊出來？
當晚的採訪地點是九龍城舊機場對面的石古龍道足球場，到步後找來找去也看不見，問問公園阿伯，才知自己走錯路。其時經已上七點半，在龍鼓灘工作一天，其實不想出來，但聰頭吹雞，點都要比面，開工前當然要食番碗十蚊碗的粉麵。
球隊練習在一個五人足球場進行，入去第一眼看見觀眾席上幾位小姐。看她們裝扮，似乎工作多過睇靚仔踢波。台左有位文裝一道的先生獨坐，手握一份印有The Homeless World Cup Edinburgh 05的資料，一邊把弄，一邊四望，足球術語叫閱讀球場。他旁邊有位標準退役足球員身型的大哥，一直密斟兼指手畫腳。
小姐說：：「影張相好嗎？」，有位穿波衫，樣子蠻年輕的男子側起身來身來，露一副又怕醜，又欲拒還迎的表情。大哥站在場邊大聲說：「慢慢黎啦，你遲早要習慣架喇﹗」
問問聰頭，才知道有眼不識泰山，原來他們都是球隊領軍人物，白恤衫的是總教練何渭枝，聰哥在我耳邊笑他老友是「廢格遜」。指手畫腳的是教練兼球員昌哥，怕怕醜醜的是球隊主將趙啟，而觀眾席上的是都是主流媒體的記者。
我狐假虎威坐近聰頭身邊，跟何渭枝草草介紹幾句就單刀直入：「喂﹗同你班波搓番兩腳得唔得先？」，他說：「呀﹗你係領男丫麻﹗你都係問聲昌哥先」
落場守龍門，有位個子不高，裝著摩打腳的「矮腳虎」向我示意射球。他預備一段卡路士射罰球般距離的助跑，吸口大氣向我狂奔，點知最後射空氣﹗笑到隊友收唔到聲。
後來阿野遲來，站在場邊，望著昌哥方向問我：「請問入面邊個係露宿者？佢？唔係呀？無個似，睇暈成場，似乎葉蔭聰最似﹗」
有點意外，這隊神秘的雜排軍，究竟怎樣組成？波都射唔準點踢世界杯？露宿者世界杯又是什麼回事？
待續．．．
(採訪：葉蔭聰、阿野、領男，攝影：葉蔭聰、領男，執筆：領男)
如果你覺得這篇文章寫得不錯，或這個網站辦得不錯，請捐款支持我們吧！
This work is licensed under a Creative Commons License