12月19日，筆者單人一部MP3機，去科學館睇下西九三壇搞笑野。一去到門口，見到大排長龍，封埋前面，話排隊入去看展覽。筆者就立即拿住部MP3機，去問門口實Ｑ哥哥，因咩差事要排隊，實Ｑ哥哥例牌地──唔答。筆者就覺得好好笑，因為我可以就咁在前面行入去，完全不用經過那條長龍，排隊就形同虛設。

我入到會場，當然就問下睇場，點解有咁唔親民的設計，做咩要排隊。個睇場就答非所問，又話裡面多人，又話我咁樣入場，即係打尖唔手規矩。睇場都傻傻地，你封住條龍，又唔係封住入口，點解我不從入口走進來。睇場好似有MP3恐懼症，一見到部MP3就好鬼驚，問我係邊個媒體，我就話係個人身分。我就真係唔係好明，點解睇場咁怕我錄音，究竟係佢怕定係西九龍皇帝曾某人怕呢？做埋咁多唔方便市民，究竟有Ｄ人係唔係有心諮詢呢？

跟住我行過去香港薈萃，負責人甲好鬼怕MP3，慌死我隊到佢咁樣。負責人乙就叫阿甲唔好理我，我問阿乙，佢就畀本書我，叫我去睇本書。阿乙都傻傻地，家陣你做「諮詢」，但係唔答市民問題，畀本書敷衍人，算咩態度呢，佢重衰到搵佢實Ｑ搞我。

過了一陣，睇場就帶埋兩個差佬，話我滋擾市民。我就梗係唔放過呢個機會，隊埋支MP3去兩個差佬度，同佢地理論。此時，旁邊有位男士就話，睇野就睇野，唔好搞搞陣。呢位男士，真係畀人洗晒腦，市民問野，challenge場地安排、地產商proposal叫搞搞震，咁係唔係要做奴隸才叫好市民。阿警察叔叔就話，今日唔係諮詢，咁我就覺得好奇怪，點解佢入話收意見，但係又阻撓我去問問題。阿警察叔叔重話佢有權charge我，同我講阿睇場有權用「適當武力」「請」我離開。我梗係要同呢班友仔理論。最終，佢抄我身分證，咁我梗係要問一問你因咩事要抄牌啦。

我一於唔理佢地，繼續單一MP3通場走。我發現有一個特點，原來從實Ｑ到政府睇場到地產商代表，都有MP3恐懼症。在咁多人當中，以政府班友的MP3恐懼症最嚴重，地產佬都係搵實Ｑ手掩掩，睇場就叫差佬。最諷刺的，係政府大大隻字話佢點樣保持開放態度聆聽民意。唔知搵差佬，郁一個得部MP3的小市民，算唔算保持開放態度。我問地產商野，佢地短極都敷衍我五分鐘，反而班政府友就答兩句都嫌多，又算唔算聆聽民意呢？

原來西九龍皇帝同佢的手下，不但患有摺檯恐懼症，重有MP3恐懼症。如果我單人一部MP3就有兩位差佬過來，幾條友用埋DV，唔知使唔使解放軍出動呢？

二００四．十二．十九深夜