立即捐款

陳煩

https://www.facebook.com/annoyingchan 網誌

生活

亞視R.I.P.,咁嗰一點收視群點算?

亞視R.I.P.,咁嗰一點收視群點算?
廣告

廣告

我寫呢篇文嘅原因,係因為我家中有一老正正係亞視嗰六萬四千個觀眾嘅其中之一。

喺我哋呢班後生仔眼中,先唔講嗰啲高志森微博、ATV焦點有幾咁犯眾憎,單單係佢好意思將上世紀曾經輝煌一時嘅《再見艷陽天》、《我和殭屍有個約會》無限輪迴,嗰種死唔斷氣同厚顏嘅程度,已經令到我哋嘆為觀止。但係我婆婆偏偏係ATV嘅忠實觀眾,由日間重播嘅《尋找他鄉的故事》到《方太教煮餸》,到夜晚時段嘅不知名韓劇,我婆婆都一一追看。

我今日返到屋企同婆婆講:「亞視要執啦喎?」點知我婆婆擺出個好落寞嘅表情話:「我而家唔開心呀,我以後喺邊度睇《鄰居冤家》?」(即係其中一套亞視外購嘅老掉牙韓劇)

喺嗰一下,我先諗到,係喎,對老一輩嚟講,如果無綫啲節目唔啱睇,起碼仲有亞視,亞視啲節目唔啱睇,咪又轉返去無綫囉,總算叫做有得揀,掹車邊都係半個老闆。而家亞視執埋,老人家唔似我哋識得上網睇HKTV、PPS同千尋影視,佢哋可以享受嘅娛樂同選擇嘅權利,比我哋更少。

而且喺大家有請小鳳姐之際,有冇諗過其實政府只係拋棄咗一隻再冇利用同維穩價值嘅棋子,然後再將個電視牌照發畀一個幾乎全香港都唔知道/唔記得/唔知講緊乜嘅香港電視娛樂,我粗淺地理解為,一係就係政府想模糊討論焦點(係慣用嘅拆彈技巧,例如早前齊昕離家出走同三跑通過就係一例),一係就係同689三口六面同你講月入低過萬四蚊嘅窮人唔該慳返啖氣,香港唔到你話事一樣,潛台詞就係:我係鍾意發個牌畀個FB Page得幾廿人Like嘅電視台呀,吹咩?至於明明有兩間公司都獲政府原則性同意發免費電視牌照,點解會發畀香港電視娛樂唔發畀奇妙電視?可能係689見今日愚人節,這叫黑色幽默,懂不懂?

講咗咁多,我唔係為ATV抱打不平,只係想大家諗下,其實無論邊個被逐離場,邊個後補披掛上陣,除咗齋食花生之外就別無選擇嘅嗰一群,仍然係我哋呢班香港人。

更多文章:陳煩

廣告