七笑上韶關（一）
廿五日清晨，
粉嶺名都商場德興茶餐廳內，
客人三三兩兩，
各佔一枱之地，
拚命為自己嘅色身加油，
唔係火腿孖卵就係前世一叮，
個個幾大就幾大，
喺娑婆呢個五濁惡世之地，
盡力搵到就食，
搵唔到就更加要食，
所謂一食解千愁，
暫時頂住娑婆嘅苦苦相逼，
不過苦海無邊，
日子一久，
呢種短期策略就變成一種理所當然嘅長期策略，
變左人間文化習俗，
情況就好似開通頂係為左應付考試，
點知最後習以為常，
卒之就變左夜鬼一樣。
而家講起食，
D人就十分亢奮，
淨係每日電視節目，
飲食節目就多到無侖，
令人腦中只諗起食，
而食完除左保住個色身可繼續維持操作之外，
仲有乜野要做，
就唔記得哂！！
不過，
係呢個人世間，
並唔係所有人都係咁懵閉閉，
當中仍有大把詐顛納福之士，
你擺下蛇宴我照食，
但係投你一票就好難喇！
呢班混喺娑婆嘅無間道，
個個身負重任，
平時分散喺唔同嘅單位扮順民，
其實就各自要拆破呢個娑婆主題公園背後嘅陰謀。
一到左月曆度以紅圈為記嘅暗號日子，
就秘密聚會，
為左掩人耳目，
多數都跟隨主流開大食會，
由朝到晚食完又食食完又食，
等班迷惑人間嘅無明集團以為呢D人都係順過順嫂嘅順民，
完全冇防備之心。
就係咁，
佢地就有機可乘。
今次趁住普天同樂嘅火雞誕，
就借頭借勢以旅遊吃喝為煙幕，
七條來自各行向業嘅隱士，
個個上足子彈，
決心展開一趟尋寶之旅，
傳說當年一代禪僧六祖收埋左好多正野喺韶關，
佢地呢一行，
就係一心想將呢度好野搵番出嚟，
睇下有乜野可以幫到淨係識食認賊作父嘅眾生。
（待續）