這邊廂班男人投訴女人sss睇《來自星星的你》睇到精神失常；那邊廂，班女人又覺得男人sss有口話人冇口話自己，打機打到猝死都勢不罷休。今年香港國際電影節有套電影《發條網》，係講戒上網毒，將以下分享送比「打機打到冇咗條命」，同埋「睇劇睇到無晒人性」的各位。
《發條網》係一套真實的紀錄片。講有一班死o靚仔日以繼夜，夜以繼日的打機。有一日，班阿爸阿媽終於頂個仔唔順，有啲呃個仔去俄羅斯旅行，有啲畀安眠藥個仔食。個班死o靚仔就咁俾人呃咗去一個大陸軍營，以軍訓同藥物幫班死o靚仔戒除上網毒癮。
我一路睇個7分幾鐘 trailer ，一路覺得班死o靚仔真係好鬼抵死，班死仔入到個軍營都無咩悔意，互相炫耀自己係打機方面係幾咁出類拔萃，有啲話我連打左三日，有啲話我打足一個月。然後，有個俾人落咗安眠藥送入來的死o靚仔，因為無啦啦俾人「的」咗入軍營，喊到好似被囚終生咁（就係圖入邊嗰個，其實班死o靚仔只會喺軍營3至4個月）。個死仔仲寫咗封水蛇春咁長的求情信畀阿媽，求媽咪「放返佢出去」。我睇到呢度心諗：「呢班友仔真係抵佢哋死啦，你哋都有今日啦。」
當我睇埋電影導演訪問，我才恍然大悟。個美國導演講返，個軍營係全中國首個戒上網毒的中心。點樣先會俾人「的」入去個軍營？點叫有「毒癮」先？原來根據中國標準，你每日打6個鐘機就係「道友」，咁個「戒毒療程」係咪心靈解「毒」，人人唔同？原來只要你入咗軍營，就會接受一式一樣的 treatment，食一樣的藥，進行一樣的軍訓。
依我睇，套電影表面上係講班「道友」點戒「網毒」，實際上揭視中國唔重視青年的人權同自由，無啦啦監生比人「的」咗入軍營戒毒。
你係唔係仲覺得班死o靚仔係唔抵可憐？啲家長都係好心幫班死仔戒毒？
但打緊機打到接近冇咗條命嘅你，or 睇《星星》睇到精神失常嘅你諗下，如果你無啦啦比人落安眠藥拉咗入軍營，局你食藥戒上網癮，你有咩感想，係唔係即時好淆底？你一日打機睇劇都可能唔止6個鐘。如果「的」我入軍營，我一定哭崩長城，一秒變狼人咬人，同大叫「媽咪，放我出來呀，嗚呀……」
我當然唔係支持佢打機 forever 啦，但無啦啦比人「的」咗入軍營，倒模般的道德觀，一式一樣的 treatment，成個 package 咪就係無人權的思想消毒？班o靚仔出返軍營，咪好似章魚丸咁俾人 shape 過，粒粒一樣？咪好似電腦咁比人撳咗 Reset 掣？
P.S. 朋友知我好鐘意睇電視，問我「如果俾人拉咗入個軍營，每個鐘食一舊屎先可以續鐘睇電視，你食唔食？」（朋友強調係爛屎）嗰下，我都諗咗一諗，當你連做自己鍾意做嘅野的自主權都無埋，其實同每秒食屎有咩分別？
如果你已經是染上《星星》毒癮的道友sss，你其實應該慶幸香港咁赤化，你仲未俾人拉入軍營。有人好陰謀論，話點解中國會有戒網毒中心，除咗係好多死仔不務正業之外，仲因為中國好驚啲o靚仔上網，聯合一齊發表反政府言論。