美國有間餐廳近日標榜龍蝦必須人道處理，即係煮佢之前要安樂死，比佢吸啲大麻，減輕痛苦。呢個聽落瘋狂又痴線嘅行為，引起大眾關注。州衛生部門就話：咁樣做應該係違法，目前正展開調查中。
據CBS報導，夏洛特的傳奇龍蝦（Charlotte's Legendary Lobster Pound）餐廳老闆Charlotte Gill原來擁有醫用大麻執照，所以佢係可以合法獲得大麻；有日突發奇想，因為唔想見到龍蝦痛苦，於是比佢索啲大麻，high曬嘅情況下先殺佢。
唔少科學研究已經引證，龍蝦同其他甲殼類動物對於疼痛係有反應，但仲未證明到個反應係咪黎自神經系統，同時，亦未能證明大麻有止痛作用。
不過，可以知道嘅係，如果想殺左龍蝦再入佢落個煲度，一樣痛苦。因為刺一下係殺唔死佢嘅，要刺好多下，就算切佢個頭，都唔可以即時殺死佢，因為龍蝦全身上下都係神經，切頭並唔影響其他部位神經的運作。
呢個兩難局面，各地大廚都各施各法，搵出自己最舒服嘅處理生龍蝦方法，（詳見此）
Charlotte Gill話，佢只係拎左隻龍蝦黎做實驗，而吸左大麻嘅龍蝦都係得佢同爸爸食過，無擺過上枱比客人食。
大家都可能擔心：我食左隻吸左大麻嘅龍蝦，對我自己有無影響架？
Gill都叫做諗過度過，佢話大麻煙霧嘅主要成分四氫大麻酚（THC），喺華氏392度就可以分解；而佢烹煮龍蝦個陣溫度高達華氏420 ，所以都叫安全。
其實要讓龍蝦死得有舒服，都唔係新鮮事。魚類保護基金會早前已經喺網上發起請願，要求禁止把生龍蝦直接入鍋烹煮。講多無謂，有無行動先係最實際，紐西蘭同義大利部分城市已經規定活龍蝦放入沸水裡煮熟係犯法，今年瑞士都立法禁止「燙活龍蝦」，必須擊暈龍蝦、喺佢無意識下烹煮。
愛護動物意識蒸蒸日上：流浪貓狗有無打疫苗、農場有無足夠空間比啲雞仔跑跑跳跳、，都成為西方國家嘅社會議題。至於素食者將呢種意識形態推向極致，索性委屈自己嘅咪蕾唔食動物。
相比之下，電擊佢又好、比大麻佢索又好，已經係比較輕微嘅主義者，至少佢地都係諗住要食龍蝦嘅，係諗住搵個方法，令自己內心好過啲。
早喺2005年挪威嘅研究斷言龍蝦「無腦」，根本唔知咩叫痛楚。美國緬因州嘅龍蝦研究中心（lobster institute）都認同呢種講法，指出龍蝦嘅神經系統同昆蟲一樣簡單，放入熱水出現抽搐等純屬反射動作，而唔係佢覺得痛。
瑞士向來喺動物權益方面都係不遺餘力，停如你想養隻寵物都唔可以亂黎：獸籠大小都有明文規定。至於天竺鼠、兔子、小雞呢啲動物唔可以喺動物園展出，以免佢地驚嚇。
或者五年後，大象犀牛都唔應該困喺圍欄；十年後，瑞士國家再無動物園存在。
高等生物對待低對生物仲好同對待自己同類。心理學有種講法可以解釋：可憐比自己弱勢嘅人，幫助佢地、從而令自己獲得滿足感。
我地已經進入動物主義過分膨脹嘅年代。