文：百花
嗱，首先，我地同意左以下的前題先：無論是否贊成佔領，都無理由俾人當傻仔係咪先！
第二，詞語解釋：萬能鎖匙即係：無論內文與果樣嘢有無關係，有無自相矛盾，都無問題，讀者只要信不要問！
最近發現方向報的萬能key 兩條：
1) 「一日最衰都係佔領／泛民」
通常是社會情況似是而非，話係咩人錯都好似有些道理的，方向報就講呢句。
百花絕對不是任何政黨的朋友，但昨日睇報紙真笑到碌地。
大家玩下找錯處呀，報導第一段：「佔領行動自九月底延至日前結束，政府統計處公布，今年九至十一月失業率維持在百分之三點三，連續五個月維持不變……」
明明段文字自己都話「佔領行動自九月底」，但又話失業率已「連續五個月維持不變」，即係早在七月已經維持著同一數字？唔通方向報分唔到５和２兩個數字？定係唔識11-9=2？
下面小標題仲離譜，話〈零售建造業 失業率上升〉，但內文張建宗明明係講緊失業率下跌喎！！！
嗱！再一次唔好俾含混的字眼和標題呃到！反轉嚟講都得！？
咁有咩升左？只係零售建造業的就業不足率上升。
首先，就業不足係話一個人想一日番八個鐘，但只有五、六個鐘的工可以番之類。這絕非說該等人士已經失業。是否受佔領影響？百花唔知，可能有啦，但都要調查下嘛，小學數學都有教啦，數字上升下跌說明不了原因，要用其他調查至講到原因架嘛。
我地若習慣哂呢啲似是而非的數字，就會成日俾人呃囉陰公。
2) 「一日最衰都係曾蔭權」
通常就係社會情況嚴重到大家都感覺到，政府走唔甩責任時，方向報就會講呢句。
鞭屍賴貪曾，現屆政府慘到咩咁，做唔到野唔可以怪佢。例子？長策報導是也。
大佬，唔好咁樣侮辱市民的智慧好喎。
（不過注意啦，除非個有錢佬大老闆已做左落湯雞好似許生和郭生咁，否則方向報好少會話有錢佬大老闆要負責的，好似侍產假報導咁，最多笑下張建宗拎住三個奶樽啫，唔會鬧果啲代表老闆的議員涼薄架。）