對網絡輿情真是慢幾拍. 從港燦那裡看到阿叔於68x巴士爆粗的短片. 然後再發展為多一事不如少一事的討論.
68x是我經常坐的一條巴士線, 所以有些感同身受. 這條線, 由旺角到元朗最少45分鐘, 如果有一個人在前後左右的地方大聲講電話, 真係會煩死, 最慘係車費唔平, 又要等幾耐, 如果無位坐, 放工返屋企這一程感覺真的很累.
有一次, 坐在旁邊有一個女生, 同男朋友係電話講數, 足足由上車講到落車, 個女仔的無理, 真的令人有慾望搶過她的手機, 叫佢男朋友即時飛起佢. 當然, 自己壓制了這種慾望.
又有一次, 在車上, 阿媽用咗一程車的時間, 鬧個7,8歲大的女兒唔識計18除2等於9 (小女孩的答案是4, 大概她只會個位乘除), 嗰位中產阿媽, 不斷罵女兒蠢, 成日淨係睇電視, 唔用腦諗野, 但佢自己又唔識解比個女聽, 點解18的一半不是4, 而是9, 足足鬧咗45分鐘, 又大聲, 成半個車廂都聽到. 我當時又有一股衝動同嗰個阿媽講, 唔係咁教女, 咁鬧法只會越鬧越蠢. 我想, 如果人少一點, 我真的會介入. 但當時車廂是滿的, 而且她們又在後排.
看完短片, 若當時我在場, 我大概不會主動與阿叔吵, 但若青年跟他已經吵起來, 我大概會幫拖, 因為佢咁鬧法, 亦影響到其他人. 當下的群眾力量和行動, 是最好處理的手法.
巴士公司亦應訓練車長如何處理這類事件, 其實鬧到咁大聲, 肯定成個車廂都知. 司機大可停車處理.