今日轉一轉個話題，唔知大家仲記唔記得TBB 有個節目，叫「K100」。可能年紀輕嘅朋友仔完全唔知，話說「K100」係TBB一個冷飯菜汁大雜匯節目，主要介紹TBB劇集嘅拍攝花絮。個節目有個「收視龍虎榜」嘅環節，主要就係話比全世界知，TBB 嘅收視係全港百分之九十幾。再另外，有個環節叫「自由講」，就係TBB 篩選左合適嘅觀眾，再比佢地上鏡發表意見，而個D 意見主要都係歌頌TBB。
雖然「K100」係一個冷飯菜汁大雜匯節目，但我依然從中得到一D樂趣。例如，我喺個節目度知道「真情」馬蹄露食泥個一幕，D泥原來係用黑朱古力粉做嘅。又例如，武俠劇提錬出黎個粒保命丹其實唔係麥提莎。而「K100」呢個節目令我最有啟發嘅就係「唐樓」呢個環節，呢個環節其實就係搵一D完全唔紅嘅演員(即係茄哩啡)做訪問，呢個環節最奧妙嘅地方，就係原來我睇睇埋埋咁多電視，都完全唔發現個茄哩啡已經做左N 年。
呢個大事大非嘅時節，點解無啦啦提起「K100」？
話說我日日睇《許SIR 4 點鐘》，愈睇就愈覺得《許SIR 4 點鐘》根本就係佔中運動嘅K100。《許SIR 4 點鐘》日日都講佔中花絮，佢仲會日日都報一報幾多人受阻。而唯一有別於「K100」，《許SIR 4點鐘》呢個節目冇好似「K100」唐樓咁，完全冇提及佔中運動嘅每個茄哩啡。許SIR當然係唔會recap絕食左N日嘅莫紹文，亦唔會重申連瞓十幾日街嘅女示威者林穎嫺。
佔中半個月，最怕各位茄哩啡「再而衰， 三而竭」……
睇完半篇文，發現我原來都係講緊佔中。佔左半個月，大家都支力到好似比哪吒將我地條龍筋連根拔起咁支力。我地一班參加佔中嘅茄哩啡就好似《曹劌論戰》個句「再而衰， 三而竭」咁。由上星期開始，FB 再冇清一式出現佔中FEEDS，個D 本來食開HIGH TEA影開自拍嘅朋友仔又再一次返回原有嘅行程，佔中運動好似慢慢fade out。但各位茄哩啡，默默付出左咁多，你地甘唔甘心先？
將《許SIR 4 點鐘》呢個節目變做長壽節目
有人話呢場佔中運動已經好似清初嘅白蓮教咁，愈搞愈唔正宗。
作為一個茄哩啡，縱使我努力到不得了，面對徒勞無功嘅局面，確實很氣餒。但呢個根本係鬥長命嘅抗爭活動，我地人人都要信自己係SIR RUN RUN，只要我地夠長命，只要我地忘不了初衷，忘不了自己，先可以得到「最後勝利」。
我再重申一次……勿忘初衷。此時此刻，主角唔會再係雙學同三子，能夠將《許SIR 4 點鐘》呢個節目變做長壽節目嘅，只有我地每一個堅持爭真普選嘅茄哩啡。