今日教大家煮嘅係「青蛙冬陰功」，煮法好簡單，青蛙七百萬隻，糖呢就兩茶匙，仲有啲橙皮添……最重要係以溫水煮蛙，要知道青蛙唔係死蠢，你扔落滾水會即刻跳走，所以要以溫水細火慢煲。
之後慢慢加大個火，但又唔好加得太大，等佢哋慢慢適應咗呢個和暖、和諧的溫度，就可以令呢班青蛙們處於水深火熱當中，卻仍然懵然不知。之後，我哋就要睇下熟唔熟，所以就要拮一拮佢，最好拮六下，拮得入就即係就熟（如果養唔熟就要拮多幾下喇）。
呢個時候，就要突然加至猛火，殺佢哋一個措手不及。之但係，差點拮死隻青蛙同埋突然猛火，其他青蛙就會feel到唔妥，就喺呢個佢哋想反抗、逃走的時候，加番幾碗糖同來自韓國的楊桃，一來可以幫煲湯吊味，二來可以轉移青蛙的視線，等佢哋食下開心下，但唔知道結果咪又係溶落煲湯到。另外，記着唔好落「品客牌」，要落「AV牌」，因為前者全是代糖、無味兼糖份極低，AV牌雖然cheap啲，但青蛙就係鍾意食呢啲。而楊桃（星星），更是青蛙的至愛，等佢哋全民一齊煲星星，咁就死咗都唔知乜事啦。
之後，得閒落啲陰功黑材料，如果有青蛙「黐底」，就用「共剷煮意」剷一剷佢，最後，淆多幾十年，就會煮出一煲富有中國特式的「青蛙冬陰功」了。
期間，可能會有幾千甚至幾萬青蛙，集體喺個煲度游來游去，或者大叫口號，不過呢一切都只係垂死的掙扎，青蛙始終係青蛙，佢哋唔敢反抗嘅。萬一，萬一真係反抗，就來一招隻手冚煲蓋，一切蓋「煲」定論啦！
轉載自新報