講到特務電影，有兩個長壽系列一定要提，就係「007鐵金剛」同埋「職業特工隊」!
第一部「007鐵金鋼」電影《Dr. No》係1962年發行，由男星Sean Connery做主角，成個系列屹立至今已經超過50年，主要係講一個來自英國MI6(軍情六處)嘅特務點樣係世界各地執行任務，剷除各種奸角嘅故事，當中曾經做過男主角嘅包括George Lazenby、Roger Moore、Timothy Dalton，直至到比較為人熟悉嘅Pierce Brosnan，同埋接棒至今嘅Daniel Craig。如果問我邊一個演得最好，我一定投Daniel Craig一票，因為佢將一個特務嘅冷靜機智、膽大心細充份表現出嚟，呢兩個特質亦係一個特務應該要有嘅要素。
第一套「職業特工隊」電影係1996年上映，由Tom Cruise擔大旗，佢飾員IMF旗下一個特務，而IMF係屬於美國CIA轄下一個非官方組織，任務同「007鐵金鋼」差不多，離唔開擊殺恐怖分子，然後拯救世界，同樣大獲好評! 不過估唔到Tom Cruise呢支旗，一擔就係16年，由1996年到2015年，拍左5套，從來無換過角色，而且佢堅持所有特技場面都要自己親身上陣，講真，100蚊港幣可以欣賞到呢份專業，已經係物超所值!
講完背景，入正題。點解特務電影可以咁長壽? 首先，你要知道呢類電影嘅賣點係咩。賣特技?賣劇情?賣型男索女?賣英雄救美?賣拯救世界? 係商業角度出發的話，以上皆是。但係，其實每個導演都有一種價值觀想透過電影去表達，頭先講嘅只係「橋段」，要黎包裝，真正賣嘅其實係「思維」。而思維就離唔開「思考」，一個法國心理學家Edward de Bono曾經為「思考」落過一個定義:「Thinking is the deliberate exploration of experience for a purpose」，簡單講，思考係有既定目的，而且係需要慎重地利用以往同現有嘅經驗。要副合呢個「思考」條件，除左特務，捨佢其誰呢? 執行任務，每秒鐘都生死悠關，每錯一個決定都隨時死無葬身之地，根本無機會可以hea住諗!
你會點樣形容一個特務? 沉著?聰明?轉數快?果斷? 以上皆是。點樣可以做到咁? 特訓一定唔少得啦，除左軍火、意志、藥物要知，最重要就係思維訓練。因為幫特務解決問題嘅係思維，唔係知識。但係，思維都有分批判同創意啵，邊樣比較重要呢? 問你一個問題，你覺得James Bond識得分析眼前個炸彈幾時爆有用啲? 定係佢識得點樣令自己唔會被炸彈炸死有用啲呢? 答案呼之欲出啦。
賣「創意思維」，唔難係特務電影入面搵到蛛絲馬跡。其實「007」係MI6啟動嘅一個特務計劃，擁有唔同編號嘅特務，被賦予權力可以係執行任務時殺人，而唔洗負法律責任，等同拎住本「殺人Passport」，遇神殺神，遇佛殺佛。問題係邊個決定當下要唔要殺人呢? James Bond。山高皇帝遠嘅M都阻止唔到，但偏偏每次都比James Bond將功贖罪，但係呢個計劃其實一直到備受爭議，隨著科技發達，已經有人提出係未來以機械人或者無人機去取代呢個計劃，特務角色面臨重大考驗。係《Skyfall》入面已經明顯有呢個鋪排，而剛上畫嘅《Spectre》就更加直接帶出呢個訊息，C提出「九眼」計劃，將世界上九個最多情報消息嘅國家所有嘅資料集中成為一個網上資料庫，然後透過鏡頭、衛星等去搜證、分析收集所得嘅情報，進一步取代特務工作。而M就堅持就算有呢一堆資料分析，都最後都要有人去行動，殺或者唔殺都要靠特務去現場判斷，從而帶出人類思維比電腦分析更有意義。
《職業特工隊：叛逆帝國》黎到第5輯，同樣面對被解散嘅下場，美國中央情報局局長Alan Hunley因為睇唔過眼IMF作風，利用克里姆林宮被嚴重炸毀一事向美國參議院監督委員狠狠參左IMF一本，令IMF被立即解散。雖然當時無明顯證據可以證明神秘組織「辛迪加」存在，反而係Ethan Hunt相信自己做左咁多年特務嘅直覺，認定事有蹺蹊，契而不捨咁追查真相，最後先可以成功將呢個組識成功瓦解，恢復IMF。好明顯，兩套電影都係要帶出人類思維嘅重要性。
然後你可能會問，點解「創意思維」咁有市場先? 好簡單，因為社會缺乏呢樣野，越被強調，越有需要 (可參考小弟一篇舊文 : 《蟻俠》給我們的英雄謎思 http://www.inmediahk.net/node/1036439)。
睇下香港社會實況，睇下香港教育制度，你會發覺原來我地係幾咁欠缺「創意思維」。鉛水事件發生左咁耐，政府咁多官員，無人提出過一個有效嘅方法去解決，卸膊卸到盡。TSA操練成風，果個所謂嘅教育局局長吳克儉情願放假，都無勇氣去面對家長，諗辦法去解決問題。走私客問題出現左咁耐，香港房屋、學位、奶粉等等嘅民生資源比大陸人禁住搶，班離地高官呢? 除左個限奶令之外，咩都無做過! 基真小學壇野，我仲記得呀，淇淇到而家仲係死得不明不白架，真相幾時先可以水落石出? 南Y島海難呢? 幾十條人命，邊個疏忽職守，邊個要血債血償呀? 填鴨教育，咪只會令香港變成咁囉，只係識得叫學生跟傳統，畫地為牢，咁搞落去，香港仲點會有希望?
我都好想香港政府有幾個好似James Bond咁醒嘅官架，可惜，佢地連庶務都未搞得掂，特務? 算啦，六師弟。