（照舊含少量劇透，但我相信不太影響觀影樂趣，反正睇呢套戲都冇乜樂趣）
之前篇文，明顯地我對「美國狙擊手」好有保留。充其量係good，冇可能係great。咁都拎奧斯卡，就真係電影之死。但我拒絕去責怪導演奇連伊士活（Clint Eastwood）。再講一次，由決定改編Chris Kyle本書，就己經係錯，個古仔根本先天不足。唯一亮點係Bradley Cooper增磅後，扮Kyle的確幾似樣。
咁到底Kyle係何許人？
講表面梗係簡單。電影改編自佢本自傳「美國狙擊手」，副題就係The Autobiography of the Most Lethal Sniper in US. Military History。
咁佢係咪真係好堅？殺左好多人（姑且當呢個係值得光榮）？好遠都打得中人？
吹毛求疵既話，唔係。反正there are many guys like you all over the world。 二千碼外中人既，唔係得佢一個。至於殺左幾多人，冇「共識」，甚至官方（即係美軍）都冇證明過Kyle自己提既數字。官方回應Kyle講既數字，只係話「講呢啲……」
但，姑且就當佢係美國最勁（即係殺人最多）既狙擊手。Few could possibly argue。 咁但，到底一個以此紀錄（甚至唔係講救左幾多人，可能為「迎合市場」）為榮既Kyle，又會係咩人呢？
Kyle係好勁既狙擊手，即係狙擊界的C朗拿度美斯米高佐敦莫扎特梵高達文西，應冇乜人異議。但你入場係咪睇佢有幾好槍法？拍戲果個係咪要講呢樣野？ 唔係丫嘛。係睇個人嘛。
Kyle愛唔愛國？我都答你唔到，咩係「愛國」，真係因人而異。咁但亦可以肯定，佢對軍人身份好自豪（有邊個軍人唔係？）。而所以，佢或者有PTSD（創傷後心理壓力緊張症），但唔係因為殺左人好不安，好可能只係因為「掉低左戰友」。甚至正如佢所講，「只後悔自己殺得唔夠多」。佢深信（自己講既）佢殺既人全部死有餘辜，仲覺得果段日子好過癮。唔係屋企人需要佢？佢就恨不得即時再番去。
呢類在書中冇的的「情義兩難全」，係拍戲時為左戲劇效果安排。類似既還有好多，例如Kyle根本冇殺過小朋友（所以亦唔使咁掙扎或好不安），而亦都從來冇人出18萬美金要佢人頭。
呢類東西，正如Mustafa（之前篇文有講） ，輕輕帶過都算。全片最拙劣既係，仲要安排個同伴質疑「老細，伊拉克好似冇出過奧運射擊金牌喎」。然後搵人解畫「因為Mustafa黎自叙利亞」。如此戲弄觀眾，去為左Kyle呢種人化妝，恕叔叔真係唔多欣賞。
都係果句，拍戲唔忠於歷史唔緊要，拍人物隱惡揚善都冇問題。但拍Kyle本自傳，本身成件事就錯到七彩。而越係想修補，就越係難睇。
而就算撇除哂呢啲電影加工，Kyle本書本身，可唔可信呢？戰場上的，未必可以證明或否定。但Kyle本人，sorry，就實在唔係好信得過。這是客觀評語，與我鍾唔鍾意佢，佢係咪好戰/愛國等等無關。
「美國狙擊手」呢本書，固然大賣，但後期版本有個chapter比人刪除左。點解？因為比人告誹謗，仲敗訴，賠左兩百萬美金。
咩回事？我嘗試簡單講下。Kyle在書入面講，佢在某間好多海豹部隊去既酒吧，兜口兜面打某人，打到佢熊貓眼。書入面冇講比人打既係乜水，但後來Kyle上清談節目時，確認（好多人都估到）果個就係前明尼蘇達洲洲長，做過摔角手既Jesse Ventura。
做乜打佢？ Kyle話，Jesse出言不遜。2006年有位海豹隊員為國捐軀，Jesse 曾經在瞻仰遺容時大肆批評伊拉克戰爭。Kyle話事發當日（2012年），Jesse在酒吧大放厥詞，唱衰戰爭，唱衰布殊總統，唱衰美國。Kyle叫佢唔好咁大聲，好多海豹隊員同家人在場。Jess就話海豹隊絕對應該死幾個人。然後Kyle就打佢。
好勇武呀可？不過呢個係Kyle既一面之辭。Jesse就話Kyle都黐孖筋，完全唔識呢條友，亦冇見過佢，更加唔好話比佢打。Jesse更加話如果有件咁既事，首先就係Kyle己經犯上襲擊罪，件事亦都應該在海豹社群間傳通街。Jesse仲識間酒吧老闆，佢從來都冇一個人去，大把人可以證明。
咁，又係典型既口同鼻拗。你以為各執一詞，但肯定既係，Jesse認為Kyle在本書度作野搏宣傳。告到上法庭。而最後法庭考慮眾多證供（Kyle的「證人」口供矛盾，Kyle咁大隻又六尺高兩百磅，如果打過老野Jesse一鑊勁的，冇理由話咁快咩痕都冇），判Jesse勝訴。頭先講左啦，賠兩百萬美金。但心水清既讀者諗真啲，其實審到一半Kyle己經意外身亡。唔緊要，邊度賠？遺產賠。本書咁賣得。
講開本書好賣得，就要講另一樣Kyle（及佢屋企人）成日比人鋤既野。Kyle既家人話，Kyle將本書既收益捐哂比退伍軍人組織。好偉大呀可。真相？ 捐左四十萬港紙左右啦。好多？ 但剩番果兩千幾萬港紙係佢屋企人袋哂。捐左2%左右啦，「行政開支」認真大。
要講落去，仲有更多。Kyle話自己在德洲（Texas）殺左兩個偷車賊，但又係天唔知地唔知冇人知得佢知，當然又係搵唔到任何證據證人。更神化既係，Kyle仲話自己在卡特里娜（Katrina） 颶風後去左新奧爾良（New Orleans），仲狙擊左幾十個（!）暴徒云云。當然，又係得啖笑。
睇到呢度， Chris Kyle係咩人，應該好清楚。
書商發錢寒就算，拍戲既癲埋一份都明白。史匹堡就踼左個波比奇連伊士活硬食。美國觀眾一於少理，最緊要立場行先，唔睇就唔愛國，等同佢地一樣去睇「刺殺金正恩」（The Interview）。希望奧斯卡班評審冇咁民粹冇咁媚俗，即係呢啲咁既戲，拎最佳電影或最佳男主角真係笑死人。最多拎改編劇本。因為，真係成功將「原本」的劇本，變到另一回事。
有關套戲同現實的不符：
http://www.salon.com/2015/01/23/7_enormous_lies_american_sniper_is_telli...
http://www.slate.com/blogs/browbeat/2015/01/23/american_sniper_fact_vs_f...
http://www.telegraph.co.uk/culture/film/film-news/11363121/american-snip...
有關Kyle的大話連篇：
http://www.slate.com/articles/news_and_politics/jurisprudence/2015/01/am...